100 ഡോളർ എനർജി റിബേറ്റ് പദ്ധതിയുടെ അപേക്ഷാ നടപടികളിൽ മാറ്റം വരുത്തുമെന്ന് പ്രീമിയർ ഡാനിയേൽ സ്മിത്ത്. എനർജി റിബേറ്റിനായുള്ള അപേക്ഷ പ്രക്രിയയിലെ കടുത്ത നിബന്ധനകൾക്കെതിരെ ജനങ്ങൾ ആശങ്ക പങ്കുവെച്ച സാഹചര്യത്തിലാണ് പ്രീമിയറുടെ നടപടി. എനർജി റിബേറ്റിനായി സോഷ്യൽ ഇൻഷുറൻസ് നമ്പർ (SIN), നികുതി വിവരങ്ങൾ, ബാങ്ക് അക്കൗണ്ട് രേഖകൾ തുടങ്ങിയ വ്യക്തിഗത വിവരങ്ങൾ നൽകേണ്ടി വരുന്നത് സുരക്ഷാ ആശങ്കയ്ക്ക് വഴിവെച്ചിരുന്നു.

വാർഷിക കുടുംബവരുമാനം 2,25,000 ഡോളറോ അതിൽ താഴെയോ ഉള്ള ആൽബർട്ട നിവാസികൾക്ക് സാമ്പത്തിക സഹായം നൽകുന്നതിനാണ് സർക്കാർ ഈ പദ്ധതി ആവിഷ്കരിച്ചത്. ഔദ്യോഗിക വെബ്‌സൈറ്റ് (Alberta.ca) വഴിയാണ് ഓൺലൈനായി അപേക്ഷിക്കേണ്ടത്. ‘ഇന്‍ററാക്’ (Interac) സംവിധാനം വഴി ബാങ്ക് മുഖേനയോ, അല്ലെങ്കിൽ ഡ്രൈവിംഗ് ലൈസൻസും സെൽഫി ചിത്രവും സമർപ്പിച്ചോ തിരിച്ചറിയൽ പരിശോധന പൂർത്തിയാക്കണമെന്നത് അപേക്ഷാ പ്രക്രിയ സങ്കീർണ്ണമാക്കുന്നുവെന്നും ആക്ഷേപമുയർന്നിരുന്നു.