റെസിഡൻഷ്യൽ ഏരിയകളിൽ ജോലി ചെയ്യുന്ന ശുചീകരണ ജീവനക്കാരെ സഹായിക്കുന്നതിനായി ഭാരം കുറഞ്ഞ ഇലക്ട്രിക് ബൈക്കുകൾ ദുബായ് മുൻസിപ്പാലിറ്റി അവതരിപ്പിച്ചു. മാലിന്യ ശേഖരണം കാര്യക്ഷമമാക്കാനും, ഫീൽഡ് പ്രവർത്തനങ്ങൾ എളുപ്പമാക്കാനും, കഠിനമായ വേനൽക്കാലത്ത് വെയിലത്ത് ജോലി ചെയ്യുന്ന ജീവനക്കാരുടെ ശാരീരിക അധ്വാനം കുറയ്ക്കാനും ലക്ഷ്യമിട്ടാണ് ഈ നീക്കം. മുൻസിപ്പാലിറ്റിയുടെ ഫീൽഡ് ക്ലീനിംഗ് സംവിധാനത്തിലേക്ക് പുതുതായി ചേർത്ത ഈ ബൈക്കുകൾ, കടുത്ത ചൂടും ഈർപ്പവുമുള്ള കാലാവസ്ഥയിൽ ജീവനക്കാർക്ക് താമസമേഖലകളിലൂടെ സുഗമമായി സഞ്ചരിച്ച് മാലിന്യങ്ങൾ ശേഖരിക്കാൻ സഹായിക്കുന്ന രീതിയിലാണ് രൂപകൽപ്പന ചെയ്തിരിക്കുന്നത്. മുൻസിപ്പാലിറ്റി സേവനങ്ങൾ സ്മാർട്ടും സുസ്ഥിരവും പരിസ്ഥിതി സൗഹൃദവുമായ മാർഗ്ഗങ്ങളിലൂടെ ആധുനികവത്കരിക്കാനുള്ള ദുബായ് മുൻസിപ്പാലിറ്റിയുടെ വിപുലമായ ശ്രമങ്ങളുടെ ഭാഗമായാണ് ഈ പദ്ധതി നടപ്പിലാക്കിയിരിക്കുന്നത്.

ഉയർന്ന താപനിലയും ഈർപ്പവുമുള്ള സമയങ്ങളിൽ ശുചീകരണ ജീവനക്കാർക്ക് കൂടുതൽ സൗകര്യപ്രദവും സുരക്ഷിതവുമായ തൊഴിൽ അന്തരീക്ഷം പ്രദാനം ചെയ്യുന്നതോടൊപ്പം, ഫീൽഡ് ക്ലീനിംഗ് പ്രവർത്തനങ്ങളുടെ കാര്യക്ഷമത വർദ്ധിപ്പിക്കാനും ഈ ബൈക്കുകൾ സഹായിക്കുമെന്ന് മുൻസിപ്പാലിറ്റി വ്യക്തമാക്കി. മണിക്കൂറിൽ 45 കിലോമീറ്റർ വരെ വേഗത കൈവരിക്കാൻ കഴിയുന്ന ഈ ഇലക്ട്രിക് ബൈക്കുകൾ, ഒറ്റത്തവണ ചാർജ് ചെയ്താൽ എട്ട് മുതൽ പത്ത് മണിക്കൂർ വരെ തുടർച്ചയായി പ്രവർത്തിക്കും. ഇത് ജീവനക്കാരെ വീണ്ടും വീണ്ടും ചാർജ് ചെയ്യേണ്ടി വരുന്ന ബുദ്ധിമുട്ടില്ലാതെ ഒരു പ്രവൃത്തിദിനം മുഴുവൻ ജോലി ചെയ്യാൻ സഹായിക്കുന്നു.

ഓരോ ബൈക്കിലും 180 മുതൽ 240 ലിറ്റർ വരെ ശേഷിയുള്ള മാലിന്യ സംഭരണ പാത്രങ്ങൾ ഘടിപ്പിച്ചിട്ടുണ്ട്. ഏകദേശം 90 കിലോഗ്രാം മാലിന്യം വഹിക്കാൻ ശേഷിയുള്ളതിനാൽ, ശേഖരിച്ച മാലിന്യം അടിക്കടി ഒഴുവാക്കാൻ പോകേണ്ടി വരുന്ന യാത്രകളുടെ എണ്ണം ഇത് കുറയ്ക്കുന്നു. 125 ആംപിയർ-അവർ ലിഥിയം-അയൺ ബാറ്ററികളാണ് ഈ ബൈക്കുകളിൽ ഉപയോഗിക്കുന്നത്. ബാറ്ററികൾ ഉൾപ്പെടെ ഇതിന് ഏകദേശം 315 കിലോഗ്രാം ഭാരമുണ്ട്. പൂർണ്ണമായും പരിസ്ഥിതി സൗഹൃദമായ ഈ ബൈക്കുകൾ കാർബൺ പുറന്തള്ളൽ കുറയ്ക്കാനും, വായുവിന്റെ ഗുണനിലവാരം മെച്ചപ്പെടുത്താനും, കൂടുതൽ സുസ്ഥിരമായ പ്രവർത്തന രീതികളിലേക്ക് നഗരത്തെ നയിക്കാനും സഹായിക്കും.

ദുബായുടെ നഗരഭംഗി നിലനിർത്തുന്നതിനും, ജനങ്ങളുടെ ജീവിതനിലവാരം ഉയർത്തുന്നതിനും, സുസ്ഥിരതയിൽ നഗരത്തെ ഒരു ആഗോള മാതൃകയാക്കുന്നതിനുമുള്ള മുൻസിപ്പാലിറ്റിയുടെ പ്രതിബദ്ധതയെയാണ് ഈ പദ്ധതി പ്രതിഫലിപ്പിക്കുന്നത്. പൊതുസേവനങ്ങളിൽ ഹരിത സാങ്കേതികവിദ്യകളും നൂതനമായ ഉപകരണങ്ങളും സ്വീകരിക്കുന്നതിനുള്ള ദുബായുടെ വിപുലമായ ശ്രമങ്ങൾക്ക് ഇത് പിന്തുണയേകുന്നു. വർഷത്തിലെ ഏറ്റവും ചൂടേറിയ മാസങ്ങളിൽ തൊഴിലാളികളുടെ ക്ഷേമത്തിന് കൂടുതൽ പ്രാധാന്യം നൽകുന്നതോടൊപ്പം, ശുചീകരണ ജീവനക്കാരുടെ ഉൽപ്പാദനക്ഷമത വർദ്ധിപ്പിക്കാനും ദുബായ് മുൻസിപ്പാലിറ്റി ഇതിലൂടെ ലക്ഷ്യമിടുന്നു.

പരമ്പരാഗത വാഹനങ്ങളെയോ പൂർണ്ണമായും മാനുവൽ രീതികളെയോ മാത്രം ആശ്രയിക്കാതെ, റെസിഡൻഷ്യൽ ഏരിയകളിലെ ക്ലീനിംഗ്, മാലിന്യ ശേഖരണ സേവനങ്ങൾ കാര്യക്ഷമമായി നടക്കുന്നുണ്ടെന്ന് ഉറപ്പാക്കാൻ ഈ നീക്കം സഹായിക്കും. നഗരത്തിന്റെ ശുചിത്വം കാത്തുസൂക്ഷിക്കുന്നതിനും പരിസ്ഥിതി ആഘാതം കുറയ്ക്കുന്നതിനുമുള്ള സ്മാർട്ട് സൊല്യൂഷനുകൾ തുടർന്നും നടപ്പിലാക്കുമെന്നും, ദുബായുടെ പൊതുജനാരോഗ്യത്തിലും നഗര പരിസ്ഥിതിയിലും പ്രധാന പങ്കുവഹിക്കുന്ന ഫീൽഡ് ടീമുകളുടെ ക്ഷേമത്തിന് മുൻഗണന നൽകുമെന്നും മുൻസിപ്പാലിറ്റി കൂട്ടിച്ചേർത്തു.