കാനഡയിലെ ലക്ഷക്കണക്കിന് കുടുംബങ്ങൾക്കും മുതിർന്ന പൗരന്മാർക്കും തൊഴിലാളികൾക്കും ആശ്വാസമായി ജൂലൈയിൽ ആറു ബെനിഫിറ്റ് പേയ്മെൻ്റുകൾ കാനഡ റവന്യൂ ഏജൻസി വിതരണം ചെയ്യും. ജൂലൈയിൽ പുതിയ ബെനിഫിറ്റ് വർഷം ആരംഭിക്കുന്നതിനാൽ മിക്ക ഫെഡറൽ ബെനിഫിറ്റ് പേയ്മെൻ്റുകളിലും രണ്ടു ശതമാനം വരെ വർധനയുണ്ടാകും.

25% വർധിപ്പിച്ച തുകയോടെ പഴയ ജി.എസ്.ടി/എച്ച്.എസ്.ടി ക്രെഡിറ്റിന് പകരമായി അവതരിപ്പിച്ച കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റിന്‍റെ ആദ്യ പേയ്‌മെൻ്റ് ജൂലൈ 3-ന് അക്കൗണ്ടിലെത്തും. കുട്ടികളുള്ള കുടുംബങ്ങൾക്കുള്ള കാനഡ ചൈൽഡ് ബെനിഫിറ്റ് ജൂലൈ 20 മുതൽ വർധിപ്പിച്ച തുകയിൽ ലഭിച്ചു തുടങ്ങും. ഇതിലൂടെ ആറ് വയസ്സിൽ താഴെയുള്ള ഓരോ കുട്ടിക്കും പ്രതിവർഷം 8,157 ഡോളർ വരെ ലഭിക്കുമെന്ന് പ്രതീക്ഷിക്കുന്നു. മുതിർന്ന പൗരന്മാർക്കുള്ള ഓൾഡ് ഏജ് സെക്യൂരിറ്റി പെൻഷനിൽ 1.2% വർധന വരുത്തിയിട്ടുണ്ട്. ജൂലൈ 29-നാണ് ഈ തുക വിതരണം ചെയ്യുക. ഇതോടൊപ്പം ജി.ഐ.എസ് ആനുകൂല്യങ്ങളും ജൂലൈയിൽ വിതരണം ചെയ്യുന്നുണ്ട്. ഭിന്നശേഷിക്കാർക്കുള്ള കാനഡ ഡിസെബിലിറ്റി ബെനിഫിറ്റ് പ്രതിമാസം 204.20 ഡോളറായി ഉയർന്നു. ജൂലൈ 16-ന് ഈ തുക വിതരണം ചെയ്യും. കൂടാതെ അഡ്വാൻസ്ഡ് കാനഡ വർക്കേഴ്സ് ബെനിഫിറ്റ്, ഒൻ്റാരിയോ ട്രിലിയം ബെനിഫിറ്റ് എന്നിവ ജൂലൈ 10-ന് വിതരണം ചെയ്യും.