ആഗോള സാമ്പത്തിക-പ്രതിരോധ മേഖലകളിൽ നിർണായക ചലനങ്ങൾ സൃഷ്ടിച്ചുകൊണ്ട് കാനഡയും ജപ്പാനും തമ്മിൽ 130 കോടിയിലധികം കനേഡിയൻ ഡോളറിന്റെ (1.3 Billion) ചരിത്രപരമായ വ്യാപാര നിക്ഷേപ കരാറുകൾ ഒപ്പുവെച്ചു. ടോക്കിയോയിൽ നടന്ന കാനഡയുടെ പ്രത്യേക വ്യാപാര ദൗത്യത്തിലാണ് (Trade Mission) ഇരു രാജ്യങ്ങളിലെയും പ്രമുഖ കമ്പനികൾ തമ്മിൽ കരാറിലെത്തിയത്. കാനഡയുടെ ചരിത്രത്തിൽ ഒരു ഏഷ്യൻ രാജ്യവുമായി നടത്തുന്ന ഏറ്റവും വലിയ ബിസിനസ്സ് പങ്കാളിത്തമാണിത്. ആർട്ടിഫിഷ്യൽ ഇന്റലിജൻസ് (AI), സുസ്ഥിര ഊർജ്ജം, പ്രതിരോധം, കൃഷി, സോഫ്റ്റ്വുഡ് വ്യവസായം തുടങ്ങിയ വിവിധ മേഖലകളിലെ നൂറ്റമ്പതിലധികം കമ്പനികൾ കരാറിന്റെ ഭാഗമാണ്. വ്യാപാര വൈവിധ്യവൽക്കരണത്തിലൂടെ ഇരു രാജ്യങ്ങളുടെയും വിപണി വിപുലീകരിക്കുകയാണ് ഈ സഖ്യത്തിന്റെ പ്രധാന ലക്ഷ്യമെന്ന് കാനഡ രാജ്യാന്തര വ്യാപാര മന്ത്രി മാരിന്ദർ സിദ്ധു വ്യക്തമാക്കി.
