മിഡിൽ ഈസ്റ്റ് സംഘർഷത്തിന്റെ പശ്ചാത്തലത്തിൽ ഇന്ധനവില കുതിച്ചുയർന്നതോടെ മെയ് മാസത്തിൽ പണപ്പെരുപ്പം രണ്ട് വർഷത്തിനിടയിലെ ഏറ്റവും ഉയർന്ന നിലയിലായതായി സ്റ്റാറ്റിസ്റ്റിക്സ് കാനഡയുടെ റിപ്പോർട്ട്. ഏപ്രിലിലെ 2.8 ശതമാനത്തിൽ നിന്നും മേയിൽ വാർഷിക പണപ്പെരുപ്പ നിരക്ക് 3.2 ശതമാനമായി ഉയർന്നു. 2023 ഡിസംബറിന് ശേഷമുള്ള ഏറ്റവും ഉയർന്ന പണപ്പെരുപ്പ നിരക്കാണിത്. മിഡിൽ ഈസ്റ്റിലെ സംഘർഷം ഹോർമുസ് കടലിടുക്ക് അടച്ചതോടെ ഇന്ധനവില 33.2 ശതമാനം ഉയർന്നതായി ഫെഡറൽ ഏജൻസി പറയുന്നു. അതേസമയം യുഎസ്-ഇറാൻ സമാധാന ചർച്ച പുരോഗമിക്കുന്ന സാഹചര്യത്തിൽ ഇന്ധനവില കുറഞ്ഞു തുടങ്ങിയിട്ടുണ്ട്.
ജെറ്റ് ഇന്ധനത്തിനുള്ള ഉയർന്ന വില മൂലം ഏപ്രിലിൽ നേരിയ കുറവുണ്ടായതിന് ശേഷം കഴിഞ്ഞ മാസം വിമാന ഗതാഗത ചെലവ് പ്രതിവർഷം 7.4 ശതമാനം വർധിച്ചു. അതേസമയം, മെയ് മാസത്തിൽ ഗ്രോസറി സാധനങ്ങളുടെ വിലയിലും വർധന രേഖപ്പെടുത്തി. പഴങ്ങളുടെയും പച്ചക്കറികളുടെയും വിലയിലെ വർധനയാണ് ഇതിന് പ്രധാന കാരണം. കമ്പ്യൂട്ടർ ഉപകരണങ്ങൾ, സോഫ്റ്റ്വെയർ, സപ്ലൈസ് എന്നിവയുടെ വില മെയ് മാസത്തിൽ 3.9 ശതമാനം വർധിച്ചു.
