ലോകത്തെ ഏറ്റവും ചെലവേറിയതും സാധാരണക്കാർക്ക് താങ്ങാനാകാത്തതുമായ ഭവന വിപണികളിലൊന്നായി കാനഡ മാറിയതായി പഠന റിപ്പോർട്ട്. എട്ട് പ്രമുഖ രാജ്യങ്ങളിലെ 96 പ്രധാന നഗരങ്ങളിലെ ഭവന വിപണികളെക്കുറിച്ച് നടത്തിയ പഠനത്തിന്റെ അടിസ്ഥാനത്തിലാണ് ഡെമോഗ്രാഫിയ ഇൻ്റർനാഷണൽ ഹൗസിങ് അഫോർഡബിലിറ്റി റിപ്പോർട്ട് തയ്യാറാക്കിയത്. കനേഡിയൻ ജനതയുടെ വരുമാനവും വീടുകളുടെ വിലയും തമ്മിലുള്ള അന്തരമാണ് ഇതിന് പ്രധാന കാരണം.
കാനഡയിലെ ആറ് പ്രധാന നഗരങ്ങളിൽ നാലും സാധാരണക്കാർക്ക് വീട് വാങ്ങാൻ ഒട്ടും അനുയോജ്യമല്ലാത്ത വിഭാഗത്തിലാണ് ഉൾപ്പെടുത്തിയിരിക്കുന്നത്. എന്നാൽ, കാനഡയിലെ എഡ്മൻ്റൻ നഗരം ആഗോളതലത്തിൽ തന്നെ വീട് വാങ്ങാൻ ഏറ്റവും എളുപ്പമുള്ള മൂന്നാമത്തെ മികച്ച വിപണിയായി തിരഞ്ഞെടുക്കപ്പെട്ടു. അതേസമയം വാൻകൂവർ 92-ആം സ്ഥാനത്തും ടൊറൻ്റോ 81-ആം സ്ഥാനത്തുമാണ്. ടൊറൻ്റോ നഗരത്തിൽ വീടുകളുടെ വില കുത്തനെ ഉയർന്നതോടെ ജനങ്ങൾ കിച്ചനർ, ബ്രാൻഡ്ഫോർഡ്, ലണ്ടൻ ഒൻ്റാരിയോ, ഗ്വൽഫ് തുടങ്ങിയ ചെറു നഗരങ്ങളിലേക്ക് കുടിയേറാൻ തുടങ്ങി. ഇതോടെ ഈ നഗരങ്ങളിലെ വീടുകളുടെ വിലയും കുത്തനെ ഉയർന്നിട്ടുണ്ട്.
