വർദ്ധിച്ചുവരുന്ന ഭക്ഷ്യവില നിയന്ത്രിക്കുന്നതിനും ഉപഭോക്താക്കൾക്ക് കുറഞ്ഞ നിരക്കിൽ കാർഷിക ഉൽപ്പന്നങ്ങൾ ലഭ്യമാക്കുന്നതിനുമായി കനേഡിയൻ സർക്കാർ പുതിയ ദേശീയ ഭക്ഷ്യസുരക്ഷാ നയം പ്രഖ്യാപിച്ചു. ഇതുമായി ബന്ധപ്പെട്ട് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ സർക്കാർ മൂന്ന് ബില്യൺ ഡോളറിന്‍റെ പദ്ധതിയാണ് അവതരിപ്പിച്ചത്.
പത്ത് വർഷം കൊണ്ട് നടപ്പാക്കുന്ന പദ്ധതിയിലൂടെ പ്രാദേശികമായി ഉൽപ്പാദിപ്പിക്കുന്ന പഴങ്ങൾ, പച്ചക്കറികൾ എന്നിവയുടെ വിതരണം ശക്തമാക്കാനും ഇടനിലക്കാരുടെ ചൂഷണം ഒഴിവാക്കാനും സാധിക്കുമെന്ന് സർക്കാർ പറയുന്നു. രാജ്യത്തെ ഭക്ഷ്യ വിതരണ കേന്ദ്രങ്ങളുടെയും ഫുഡ് ഹബ്ബുകളുടെയും വികസനത്തിനായി ഒരു ബില്യൺ ഡോളർ മാറ്റിവെക്കും. ഇത് വഴി ചെറുകിട വ്യാപാരികൾക്ക് കർഷകരിൽ നിന്ന് നേരിട്ട് ഉൽപ്പന്നങ്ങൾ വാങ്ങാൻ സാധിക്കുകയും വിപണിയിലെ വൻകിട കമ്പനികളുടെ കുത്തക നിയന്ത്രിക്കാൻ കഴിയുകയും ചെയ്യും. കൂടാതെ, പ്രതികൂല കാലാവസ്ഥയിലും വർഷം മുഴുവൻ കൃഷി സാധ്യമാക്കുന്ന ഗ്രീൻഹൗസ്, ഹൈഡ്രോപോണിക്സ് സാങ്കേതികവിദ്യകൾക്കായി 750 മില്യൺ ഡോളർ അനുവദിച്ചിട്ടുണ്ട്. വിത്തുകൾ, വളങ്ങൾ, മൃഗങ്ങൾക്കുള്ള ആഹാരം എന്നിവയുടെ വിതരണത്തിനുള്ള സർക്കാർ അനുമതികൾ വേഗത്തിലാക്കാനും പുതിയ പദ്ധതി അനുവദിക്കുന്നു.
