ഊർജ്ജ സുരക്ഷ ഉറപ്പാക്കുന്നതിനായി കാനഡയിൽ നിന്ന് ക്രൂഡ് ഓയിൽ ഇറക്കുമതി ചെയ്യാൻ ഒരുങ്ങുകയാണ് ഇന്ത്യ. കാനഡയിൽ നിന്ന് ക്രൂഡ് ഓയിൽ ലഭ്യമാക്കുന്നതിനുള്ള സാധ്യതകൾ ഇന്ത്യ പരിശോധിച്ചു വരികയാണെന്ന് കാനഡയിലെ ഇന്ത്യൻ ഹൈക്കമ്മീഷണർ ദിനേഷ് പട്നായിക് അറിയിച്ചു. കാനഡയിൽ ഉൽപ്പാദിപ്പിക്കുന്ന ‘ഹെവി ക്രൂഡ്’ സംസ്കരിക്കാൻ ശേഷിയുള്ള ആധുനിക റിഫൈനറികൾ ഇന്ത്യയിലുണ്ടെന്ന് അദ്ദേഹം പറഞ്ഞു. കാൽഗറിയിൽ നടന്ന ഗ്ലോബൽ എനർജി ഷോയിൽ സംസാരിക്കുകയായിരുന്നു അദ്ദേഹം. ഇരുരാജ്യങ്ങളും തമ്മിലുള്ള ഊർജ്ജ സഹകരണം മെച്ചപ്പെടുത്തുന്നതിനെക്കുറിച്ച് ഉദ്യോഗസ്ഥതലത്തിൽ ചർച്ച നടക്കുന്നുണ്ടെന്നും അദ്ദേഹം വെളിപ്പെടുത്തി.
നിലവിൽ പശ്ചിമേഷ്യ, റഷ്യ, യുഎസ്, ലാറ്റിൻ അമേരിക്ക തുടങ്ങിയ രാജ്യങ്ങളെയാണ് ഇന്ത്യ ഇന്ധനത്തിനായി ആശ്രയിക്കുന്നത്. എന്നാൽ, ആഗോളതലത്തിൽ ക്രൂഡ് ഓയിൽ വിലയിലുണ്ടാകുന്ന വ്യതിയാനങ്ങളും ഭൗമരാഷ്ട്രീയ സാഹചര്യങ്ങളും കണക്കിലെടുത്ത്, ഇന്ധന സ്രോതസ്സുകൾ വൈവിധ്യവത്കരിക്കാനാണ് ഇന്ത്യയുടെ ശ്രമം. ലോകത്തെ പ്രമുഖ ക്രൂഡ് ഓയിൽ, പ്രകൃതിവാതക ഉൽപ്പാദക രാജ്യമാണ് കാനഡ. നിലവിൽ കാനഡയുടെ ഇന്ധന കയറ്റുമതിയിൽ വലിയൊരു പങ്കും അമേരിക്കയിലേക്കാണ് പോകുന്നത്. എന്നാൽ, ഏഷ്യൻ വിപണികളിലേക്കുകൂടി തങ്ങളുടെ കയറ്റുമതി വ്യാപിപ്പിക്കാൻ കാനഡയും തയ്യാറാണ്.
