ശ്രദ്ധക്കുറവും അമിതമായ ചടുലതയും പ്രകടമാകുന്ന അറ്റൻഷൻ ഡെഫിസിറ്റ് ഹൈപ്പർആക്ടിവിറ്റി ഡിസോർഡർ (ADHD) സാധാരണയായി മാനസിക-പെരുമാറ്റ പ്രശ്നമായാണ് പരക്കെ വിലയിരുത്തപ്പെടാറുള്ളത്. ഒരു സ്ഥലത്ത് ശാന്തമായി ഇരിക്കാൻ കഴിയാതിരിക്കുക, അക്ഷമയോടെ കാര്യങ്ങളെ സമീപിക്കുക, പെട്ടെന്നുള്ള തീരുമാനങ്ങൾ എടുക്കുക, ഒരു കാര്യത്തിലും ദീർഘനേരം ശ്രദ്ധ കേന്ദ്രീകരിക്കാൻ സാധിക്കാതെ വരിക എന്നിവയാണ് ഈ നാഡീവ്യൂഹ തകരാറിന്റെ പൊതുവായ ലക്ഷണങ്ങൾ. എന്നാൽ, എഡിഎച്ച്ഡി കേവലം ബാഹ്യമായ പെരുമാറ്റങ്ങളെ മാത്രമല്ല, ഒരു വ്യക്തിയുടെ പ്രത്യുത്പാദനപരമായ ആരോഗ്യ വ്യവസ്ഥയെപ്പോലും സാരമായി ബാധിക്കാമെന്നാണ് പുതിയ ശാസ്ത്രീയ പഠനങ്ങൾ വ്യക്തമാക്കുന്നത്.

ഈ അവസ്ഥയുമായി ബന്ധപ്പെട്ടുണ്ടാകുന്ന ഹോർമോൺ വ്യതിയാനങ്ങളും, വ്യക്തികൾ നേരിടുന്ന ജീവിതശൈലി വെല്ലുവിളികളും, നാഡീവ്യൂഹപരമായ കാരണങ്ങളും ചേരുമ്പോൾ അത് ലൈംഗികാരോഗ്യം, ആർത്തവ ചക്രം, പ്രത്യുത്പാദന സംരക്ഷണം എന്നിവയെ പ്രതികൂലമായി ബാധിക്കുമെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു. എഡിഎച്ച്ഡി നേരിടുന്നവരിൽ കണ്ടുവരുന്ന ഹോർമോൺ വ്യതിയാനങ്ങൾ സ്ത്രീകളിലെ ആർത്തവക്രമത്തെ ഗണ്യമായി സ്വാധീനിക്കാറുണ്ട്. ഫരീദാബാദ് ഫോർട്ടിസ് ഹോസ്പിറ്റലിലെ ഒബ്‌സ്റ്റെട്രിക്‌സ് ആൻഡ് ഗൈനക്കോളജി കൺസൾട്ടന്റായ ഡോ. ഇഷ വാധവാൻ എൻഡിടിവി ലൈഫ് ലൈനിന് നൽകിയ അഭിമുഖത്തിൽ ഇക്കാര്യം സ്ഥിരീകരിക്കുന്നുണ്ട്. അതുകൊണ്ടുതന്നെ, എഡിഎച്ച്ഡിയെ കേവലമൊരു പെരുമാറ്റ പ്രശ്നമായി കാണാതെ ശരീരത്തിന്റെ മൊത്തത്തിലുള്ള ആരോഗ്യവുമായി ബന്ധപ്പെടുത്തി മനസ്സിലാക്കേണ്ടതുണ്ട്.