കനേഡിയൻ മലയാളികളെ ആവേശത്തിലാഴ്ത്തി 16-ാമത് കനേഡിയൻ നെഹ്‌റു ട്രോഫി വള്ളംകളിയുടെ ഔദ്യോഗിക പതാക ഉയർത്തൽ ചടങ്ങ് ബ്രാംപ്ടൺ സിറ്റി ഹാളിൽ നടന്നു. വിവിധ മലയാളി സംഘടനകളുടെ സാന്നിധ്യത്തിൽ നടന്ന ചടങ്ങിൽ കാനഡ ട്രഷറി ബോർഡ് ചെയർമാൻ ഷഫ്ഖാത് അലി, ബ്രാംപ്ടൺ മേയർ പാട്രിക് ബ്രൗൺ, സിറ്റി കൗൺസിലർമാർ എന്നിവർ പങ്കെടുത്തു. ഓഗസ്റ്റ് എട്ടിനാണ് വള്ളംകളി പ്രേമികൾ കാത്തിരിക്കുന്ന കനേഡിയൻ നെഹ്‌റു ട്രോഫി വള്ളംകളി.
ബ്രാംപ്ടൺ മലയാളി സമാജം ജനറൽ സെക്രട്ടറി ലെജു രാമചന്ദ്രൻ ചടങ്ങിൽ സ്വാഗതം ആശംസിച്ചു. പ്രസിഡൻ്റ് കുര്യൻ പ്രകാനം അധ്യക്ഷത വഹിച്ചു. കനേഡിയൻ നെഹ്‌റു ട്രോഫി വള്ളംകളിയുടെ ഈ വർഷത്തെ മെഗാ സ്പോൺസറും സമാജം വൈസ് പ്രസിഡൻ്റുമായ അരുൺ ശിവരാമന് ചടങ്ങിൽ ‘പ്രസിഡന്‍റസ് മെഡൽ’ നൽകി ആദരിച്ചു. സമാജം ഭാരവാഹികളായ ഷിബു ചെറിയാൻ (ട്രഷറർ), ബിനു ജോഷ്വ (വൈസ് പ്രസിഡൻ്റ്), ഷിബു കൂടൽ, റസീഫ് സലിം, ജിതിൻ പുത്തൻവീട്ടിൽ, ജെഫിൻ വാലായിൽ തുടങ്ങിയവർ സംസാരിച്ചു. സിറ്റി ഹാളിൽ പതാക ഉയർന്നതോടെ മത്സരത്തിനായുള്ള ടീമുകളുടെ രജിസ്ട്രേഷനും പ്രചാരണ പരിപാടികളും സജീവമായതായി ഓർഗനൈസിംഗ് സെക്രട്ടറിമാരായ തോമസ് കോന്നി, ജോമൽ സെബാസ്റ്റ്യൻ എന്നിവർ അറിയിച്ചു.
