ബ്രിട്ടീഷ് കൊളംബിയയിലെ കരിബൂ റീജിയണിൽ നിയന്ത്രണാതീതമായി പടരുന്ന ‘സ്വീഡ് ക്രീക്ക്’ കാട്ടുതീ വലിയ ഭീഷണിയുയർത്തുന്നു. ആളിപ്പടരുന്ന ജനങ്ങളുടെ ജീവനും ആരോഗ്യത്തിനും ഭീഷണിയുയർത്തുന്ന സാഹചര്യത്തിൽ റീജിയണിലെ ഇരുപതിലധികം പ്രദേശങ്ങളിൽ കരിബൂ റീജിയണൽ ഡിസ്ട്രിക്റ്റ് ഒഴിപ്പിക്കൽ ഉത്തരവ് പ്രഖ്യാപിച്ചു. എപ്പോൾ വേണമെങ്കിലും മാറിത്താമസിക്കാൻ തയ്യാറായിരിക്കണമെന്ന് പ്രദേശവാസികൾക്ക് നിർദ്ദേശം നൽകിയിട്ടുണ്ട്. ഇതിനായി വാഹനങ്ങളിൽ ഇന്ധനം പൂർണ്ണമായും നിറച്ച് സൂക്ഷിക്കാനും അടിയന്തര ആവശ്യങ്ങൾക്കുള്ള ബാഗുകൾ തയ്യാറാക്കി വെക്കാനും അധികൃതർ ആവശ്യപ്പെട്ടു. മേഖലയിൽ തുടരുന്ന കടുത്ത വരൾച്ചയും, ഉണങ്ങിയ മരങ്ങളുമാണ് കാട്ടുതീ വേഗത്തിൽ പടരാൻ കാരണമായത്.
ഏകദേശം 1,815 ഹെക്ടറിലധികം പ്രദേശത്ത് കാട്ടുതീ ഇതിനകം പടർന്നു കഴിഞ്ഞു. തിങ്കളാഴ്ച 150 ഹെക്ടർ മാത്രമായിരുന്ന തീയാണ് ദിവസങ്ങൾക്കുള്ളിൽ ഇത്രയും ഭീകരമായി വർദ്ധിച്ചത്. നിലവിൽ 106 ഫയർഫോഴ്സ് ജീവനക്കാരും, 11 ഹെവി മെഷീനറികളും, നിരവധി എയർക്രാഫ്റ്റുകളും തീ അണയ്ക്കാനായി രംഗത്തുണ്ട്. രാത്രി സമയങ്ങളിൽ നൈറ്റ് വിഷൻ സൗകര്യമുള്ള ഹെലികോപ്റ്ററുകൾ ഉപയോഗിച്ചാണ് കാട്ടുതീ നിയന്ത്രണവിധേയമാക്കാൻ പ്രവർത്തിക്കുന്നത്.
