പ്രധാനമന്ത്രിയുടെ വസതിയിൽ നിന്ന് 45 കിലോമീറ്റർ അകലേക്ക് പുനരധിവസിപ്പിക്കുന്ന ചേരി നിവാസികൾക്കായുള്ള സ്കൂൾ, യാത്രാ സൗകര്യങ്ങൾ എന്നിവയുടെ വിശദാംശങ്ങൾ സമർപ്പിക്കാൻ കേന്ദ്ര സർക്കാരിന് ഡൽഹി ഹൈക്കോടതി നിർദ്ദേശം നൽകി.
ന്യൂഡൽഹിയിലെ റേസ് കോഴ്സ് റോഡിലുള്ള പ്രധാനമന്ത്രിയുടെ വസതിക്ക് സമീപം താമസിക്കുന്നവരും ഇപ്പോൾ ഒഴിപ്പിക്കപ്പെടാൻ പോകുന്നവരുമായ ചേരി നിവാസികൾ, തങ്ങളെ പുനരധിവസിപ്പിക്കുന്ന സ്ഥലത്ത് അടിസ്ഥാന സൗകര്യങ്ങളുടെ കുറവുണ്ടെന്ന് സത്യവാങ്മൂലത്തിൽ ചൂണ്ടിക്കാണിച്ചതിനെ തുടർന്നാണ് ഹൈക്കോടതി ഇടപെടൽ. ഏകദേശം 45 കിലോമീറ്റർ അകലെയുള്ള വടക്കുപടിഞ്ഞാറൻ ഡൽഹിയിലെ ‘സാവ്ദ ഘേവ്ര’ (Savda Ghevra) എന്ന സ്ഥലത്ത് ലഭ്യമായ സ്കൂളുകളുടെ വിശദാംശങ്ങൾ സമർപ്പിക്കാൻ ഡൽഹി ഹൈക്കോടതി വെള്ളിയാഴ്ച കേന്ദ്ര സർക്കാരിനോട് ആവശ്യപ്പെട്ടു.
ഉയർന്ന സെക്കൻഡറി സ്കൂൾ സൗകര്യങ്ങളുടെ കുറവ് ഉൾപ്പെടെ, ആവശ്യത്തിന് വിദ്യാഭ്യാസ-ആരോഗ്യ പരിരക്ഷാ സൗകര്യങ്ങളില്ലെന്നും വെള്ളം, വൈദ്യുതി, മലിനജല നിർമ്മാർജ്ജനം (sewage) എന്നിവയുടെ അഭാവമുണ്ടെന്നും ചേരി നിവാസികൾ തങ്ങളുടെ സത്യവാങ്മൂലത്തിൽ ചൂണ്ടിക്കാണിച്ചിട്ടുണ്ട്. തങ്ങളെ മാറ്റുന്ന കോളനിയിൽ നിന്നും ഏറ്റവും അടുത്തുള്ള മെട്രോ സ്റ്റേഷനിലേക്ക് കൃത്യമായ കണക്റ്റിവിറ്റി സൗകര്യങ്ങൾ ഇല്ലെന്നും, മെട്രോ സ്റ്റേഷനിലേക്കും ബസ് സ്റ്റോപ്പിലേക്കും പോകുന്ന വഴി വിജനവും ഒറ്റപ്പെട്ടതുമായ പ്രദേശത്തിലൂടെയായതിനാൽ ഇത് സുരക്ഷാ ഭീഷണിയുയർത്തുന്നുണ്ടെന്നും അവർ അവകാശപ്പെട്ടു.
