വാഷിങ്ടണ്‍: അമേരിക്കയെ ഞെട്ടിച്ച് വൈറ്റ് ഹൗസിന് സമീപം വെടിവെപ്പ്. അതീവ സുരക്ഷാ മേഖലയിലുണ്ടായ ആക്രമണത്തില്‍ ഒരു വഴിയാത്രക്കാരന് ഗുരുതരമായി പരുക്കേറ്റു. വൈറ്റ് ഹൗസ് ചെക്ക് പോയിന്റിന് സമീപത്തേക്ക് വെടിയുതിര്‍ത്തു മുന്നേറിയ അക്രമിയെ സുരക്ഷാ സേന വെടിവച്ചുകൊന്നു. ആക്രമണത്തെ തുടര്‍ന്ന് യുഎസ് രഹസ്യാന്വേഷണ വിഭാഗമായ സീക്രട്ട് സര്‍വീസ് വൈറ്റ് ഹൗസിന്റെ വടക്കേ പുല്‍ത്തകിടിയില്‍ (North Lawn) നിന്ന് ആളുകളെ അടിയന്തരമായി ഒഴിപ്പിച്ചു. സംഭവത്തെക്കുറിച്ച് എഫ്.ബി.ഐ (FBI) ഡയറക്ടര്‍ കാഷ് പട്ടേല്‍ ഔദ്യോഗികമായി അന്വേഷണം പ്രഖ്യാപിച്ചിട്ടുണ്ട്.
വൈറ്റ് ഹൗസിന്റെ സുരക്ഷാ ഗേറ്റിന് സമീപത്തേക്ക് അക്രമി തോക്കുമായി വെടിയുതിര്‍ത്തു വരികയായിരുന്നു. തുടര്‍ന്ന് സീക്രട്ട് സര്‍വീസ് ഉദ്യോഗസ്ഥരുമായി ഉണ്ടായ ശക്തമായ ഏറ്റുമുട്ടലിലാണ് ഇയാള്‍ കൊല്ലപ്പെട്ടത്. ഈ സമയം സമീപത്തുണ്ടായിരുന്ന ഒരു വഴിയാത്രക്കാരനാണ് വെടിയേറ്റത്. ഇയാളുടെ നില അതീവ ഗുരുതരമായി തുടരുകയാണെന്ന് ആശുപത്രി അധികൃതര്‍ അറിയിച്ചു. ആക്രമണത്തില്‍ തങ്ങളുടെ ഉദ്യോഗസ്ഥര്‍ക്കൊന്നും പരിക്കേറ്റിട്ടില്ലെന്ന് സീക്രട്ട് സര്‍വീസ് സ്ഥിരീകരിച്ചു.
വെടിവെപ്പ് നടക്കുമ്പോള്‍ യുഎസ് പ്രസിഡന്റ് ഡോണള്‍ഡ് ട്രംപ് വൈറ്റ് ഹൗസിനുള്ളില്‍ ഉണ്ടായിരുന്നു. അക്രമം പൊട്ടിപ്പുറപ്പെട്ട ഉടന്‍ തന്നെ വൈറ്റ് ഹൗസില്‍ കടുത്ത ലോക്ഡൗണ്‍ പ്രഖ്യാപിക്കുകയും പ്രസിഡന്റിനെ സുരക്ഷിത കേന്ദ്രത്തിലേക്ക് മാറ്റുകയും ചെയ്തു. പിന്നീട് സ്ഥിതിഗതികള്‍ നിയന്ത്രണവിധേയമായ ശേഷമാണ് ലോക്ഡൗണ്‍ പിന്‍വലിച്ചത്. സംഭവസമയത്ത് നിരവധി മാധ്യമപ്രവര്‍ത്തകര്‍ വൈറ്റ് ഹൗസിനുള്ളില്‍ ഉണ്ടായിരുന്നെങ്കിലും മറ്റാര്‍ക്കും പരിക്കേറ്റതായി റിപ്പോര്‍ട്ടുകളില്ല. നിലവില്‍ കനത്ത സുരക്ഷാ വലയത്തിലാണ് വൈറ്റ് ഹൗസും പരിസരപ്രദേശങ്ങളും. ഒരു മാസം മുമ്പ് വൈറ്റ് ഹൗസ് കറസ്പോണ്ടന്റ്സ് അത്താഴവിരുന്നിനിടെയും സമാനമായ രീതിയില്‍ വെടിവയ്പ് നടന്നിരുന്നു.
