മിയാമി: മിയാമിയിൽ ലൈവ് സ്ട്രീമിംഗിനിടെ അമിതമായി ലഹരിമരുന്ന് ഉപയോഗിച്ചതിനെത്തുടർന്ന് പ്രമുഖ ഇൻഫ്ലുവൻസർ ക്ലാവിക്കുലാറിനെ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാത്രി മിയാമിയിലെ ബ്രിക്വൽ ഏരിയയിൽ വെച്ച് മറ്റ് രണ്ട് ഇൻഫ്ലുവൻസർമാർക്കൊപ്പം ലൈവ് വീഡിയോ ചെയ്യുന്നതിനിടെയാണ് ഇരുപതുകാരനായ ക്ലാവിക്കുലാർ തളർന്നുവീണത്. ഇദ്ദേഹത്തിന്റെ ആരോഗ്യനിലയിൽ ആശങ്ക പ്രകടിപ്പിച്ച് ലക്ഷക്കണക്കിന് ആരാധകർ രംഗത്തെത്തിയതോടെയാണ് സംഭവം പുറത്തറിയുന്നത്.
ബ്രാഡൻ പീറ്റേഴ്സ് എന്ന യഥാർത്ഥ പേരുള്ള ക്ലാവിക്കുലാർ, സൗന്ദര്യം വർദ്ധിപ്പിക്കാൻ തീവ്രമായ വഴികൾ തേടുന്ന ‘ലുക്ക്സ്മാക്സിംഗ്’ എന്ന ഓൺലൈൻ ട്രെൻഡിലൂടെയാണ് പ്രശസ്തനായത്. ലൈവ് സ്ട്രീമിംഗിനിടെ ഇദ്ദേഹം അവ്യക്തമായി സംസാരിക്കുന്നതും ഒടുവിൽ ബോധരഹിതനായി വീഴുന്നതും കണ്ട് പരിഭ്രാന്തരായ സുഹൃത്തുക്കളാണ് വീഡിയോ പെട്ടെന്ന് അവസാനിപ്പിച്ചത്. തുടർന്ന് മിയാമി ഫയർ ആൻഡ് റെസ്ക്യൂ സംഘം സ്ഥലത്തെത്തി ഇദ്ദേഹത്തെ ആശുപത്രിയിലേക്ക് മാറ്റി. ശരീരഭാരം കുറയ്ക്കാനും മെലിഞ്ഞ ശരീരം നിലനിർത്താനും താൻ മെത്താംഫെറ്റാമൈൻ ഉപയോഗിക്കാറുണ്ടെന്ന് ക്ലാവിക്കുലാർ മുൻപ് വെളിപ്പെടുത്തിയിട്ടുണ്ട്.
ആശുപത്രിയിൽ നിന്ന് ഡിസ്ചാർജ് ആയ ശേഷം ബുധനാഴ്ച രാവിലെ ക്ലാവിക്കുലാർ എക്സിലൂടെ പ്രതികരിച്ചു. “അതൊരു ഭീകരമായ അനുഭവമായിരുന്നു. പൊതുസ്ഥലങ്ങളിൽ സാധാരണക്കാരെപ്പോലെ പെരുമാറാനാണ് ലഹരിമരുന്നുകൾ ഉപയോഗിക്കുന്നത്, പക്ഷേ അതൊരു ശരിയായ പരിഹാരമല്ല,” എന്ന് അദ്ദേഹം കുറിച്ചു. കഴിഞ്ഞ മാസവും മറ്റൊരു കേസുമായി ബന്ധപ്പെട്ട് ഇദ്ദേഹം അറസ്റ്റിലായിരുന്നു. ലഹരിമരുന്നിന്റെ അമിത ഉപയോഗം യുവാക്കൾക്കിടയിൽ വർദ്ധിച്ചുവരുന്നതിനെക്കുറിച്ച് ഈ സംഭവം വലിയ ചർച്ചകൾക്ക് വഴിതെളിച്ചിട്ടുണ്ട്.
