വാഞ്ചൂവർ: കാനഡ സർക്കാരിന്റെ തോക്ക് തിരികെ വാങ്ങൽ പദ്ധതിയുടെ ഭാഗമായി ആയുധങ്ങൾ കൈമാറാൻ സ്റ്റേഷനുകളിൽ നേരിട്ട് എത്തരുതെന്ന് ബ്രിട്ടീഷ് കൊളംബിയയിലെ ആർസിഎംപി ഉദ്യോഗസ്ഥർ പൊതുജനങ്ങൾക്ക് മുന്നറിയിപ്പ് നൽകി. കഴിഞ്ഞ ദിവസങ്ങളിൽ അപ്പർ ഫ്രേസർ വാലിയിലെ പോലീസ് സ്റ്റേഷനിൽ നിരവധി വ്യക്തികൾ തോക്കുകളുമായി നേരിട്ട് എത്തിയതിനെത്തുടർന്നാണ് ഈ ജാഗ്രതാ നിർദ്ദേശം. സുരക്ഷിതമല്ലാത്തതോ രജിസ്റ്റർ ചെയ്യാത്തതോ ആയ ആയുധങ്ങളുമായി പോലീസ് സ്റ്റേഷനുകളിൽ പ്രവേശിക്കുന്നത് ക്രിമിനൽ കുറ്റമാണെന്ന് അധികൃതർ ഓർമ്മിപ്പിച്ചു.
നിരോധിത തോക്കുകൾ കൈവശമുള്ളവർ പദ്ധതിയുടെ ഭാഗമായി രജിസ്റ്റർ ചെയ്തിട്ടുണ്ടെങ്കിൽ, ആയുധങ്ങൾ ശേഖരിക്കുന്നതിനായി പ്രത്യേക സമയം അനുവദിച്ചുകൊണ്ടുള്ള നിർദ്ദേശങ്ങൾ അധികൃതരിൽ നിന്ന് നേരിട്ട് ലഭിക്കും. അതുവരെ തോക്കുകൾ കൈവശം തന്നെ സൂക്ഷിക്കണം. മാർച്ച് 31-നായിരുന്നു പദ്ധതിയിൽ രജിസ്റ്റർ ചെയ്യാനുള്ള അവസാന തീയതി. ബ്രിട്ടീഷ് കൊളംബിയയിൽ മാത്രം 15,600 തോക്കുകൾ ഇത്തരത്തിൽ രജിസ്റ്റർ ചെയ്യപ്പെട്ടിട്ടുണ്ട്. രജിസ്റ്റർ ചെയ്യാൻ സാധിക്കാത്തവരും ആയുധങ്ങൾ കൈമാറാൻ ആഗ്രഹിക്കുന്നവരും നേരിട്ട് സ്റ്റേഷനിൽ വരുന്നതിന് പകരം പ്രാദേശിക പോലീസ് വകുപ്പിന്റെ നോൺ എമർജൻസി നമ്പറിൽ വിളിച്ച് നിർദ്ദേശങ്ങൾ തേടണം.
AR-15, Ruger Mini-14 തുടങ്ങിയ 2,500 തരം തോക്കുകൾക്കാണ് കാനഡയിൽ നിലവിൽ നിരോധനമുള്ളത്. ഇത്തരം ആയുധങ്ങൾ യുദ്ധഭൂമിയിൽ മാത്രം ഉപയോഗിക്കേണ്ടവയാണെന്നും ജനവാസ മേഖലകളിൽ ഇവയ്ക്ക് സ്ഥാനമില്ലെന്നുമാണ് സർക്കാരിന്റെ നിലപാട്. ഒക്ടോബർ 30-നകം നിരോധിത തോക്കുകൾ നിർവീര്യമാക്കുകയോ അധികൃതർക്ക് കൈമാറുകയോ ചെയ്യണം. തോക്കിന്റെ ഇനം അനുസരിച്ച് 150 ഡോളർ മുതൽ 10,000 ഡോളർ വരെയാണ് ഉടമകൾക്ക് നഷ്ടപരിഹാരമായി സർക്കാർ നൽകുന്നത്. ആയുധങ്ങൾ കൈമാറുന്ന വേളയിൽ അബദ്ധത്തിൽ പോലും അപകടങ്ങൾ ഉണ്ടാകാതിരിക്കാനാണ് സ്റ്റേഷനുകളിൽ നേരിട്ട് വരുന്നത് ഒഴിവാക്കാൻ ആവശ്യപ്പെടുന്നത്.
