ടൊറൻ്റോയിലും ജിടിഎയിലും കനത്ത മഴ തുടരുന്നതിനെത്തുടർന്ന് പ്രധാന റോഡുകൾ വെള്ളത്തിനടിയിലായി. ബുധനാഴ്ച പെയ്ത അതിശക്തമായ മഴയിൽ നഗരത്തിന്റെ പല ഭാഗങ്ങളിലും വെള്ളക്കെട്ട് രൂപപ്പെട്ടതോടെ വാഹനയാത്രക്കാർ അതീവ ജാഗ്രത പാലിക്കണമെന്ന് പൊലീസ് നിർദ്ദേശം നൽകി. മഴ തുടരുന്നതിനാൽ ഉച്ചകഴിയുന്നതോടെ സ്ഥിതിഗതികൾ കൂടുതൽ വഷളാകാൻ സാധ്യതയുണ്ടെന്നും അതത് മേഖലകളിലെ കൺസർവേഷൻ അതോറിറ്റിയുമായി ബന്ധപ്പെട്ട് വിവരങ്ങൾ ശേഖരിക്കണമെന്നും അധികൃതർ നിർദ്ദേശിച്ചു.
അതേസമയം വാരാന്ത്യത്തിലും കനത്ത മഴയ്ക്ക് സാധ്യതയുണ്ട്. 40 മില്ലിമീറ്റർ വരെ മഴ ലഭിക്കുമെന്നാണ് കാലാവസ്ഥാ പ്രവചനം. പലയിടങ്ങളിലും ഡ്രെയിനേജ് സംവിധാനങ്ങൾ നിറഞ്ഞൊഴുകിയതോടെ പ്രധാന പാതകളായ ഗാർഡിനർ എക്സ്പ്രസ് വേ, ലോറൻസ് അവന്യൂ ഈസ്റ്റ്, ബിർച്ച്മൗണ്ട് റോഡ്, നോർത്ത്ലൈൻ റോഡ് എന്നിവിടങ്ങളിൽ വലിയ തോതിൽ വെള്ളക്കെട്ട് രൂപപ്പെട്ടിട്ടുണ്ട്. റോഡുകളിലെ വെള്ളക്കെട്ട് കാരണം പലയിടങ്ങളിലും വാഹനങ്ങൾ തിരിച്ചുവിടുകയോ യാത്രക്കാർക്ക് വഴിമാറി പോകേണ്ട സാഹചര്യം ഉണ്ടാവുകയോ ചെയ്തു.
