പ്രവിശ്യയിലെ വൈൻ നികുതിയിൽ മാറ്റം വരുത്തി ആൽബർട്ട സർക്കാർ. കഴിഞ്ഞ വർഷം നടപ്പിലാക്കിയ വിലയെ അടിസ്ഥാനമാക്കിയുള്ള (Ad Valorem) നികുതി സർക്കാർ പിൻവലിച്ചു. ഈ നികുതി സംവിധാനം ഉപഭോക്താക്കൾക്കിടയിലും വ്യാപാരികൾക്കിടയിലും വ്യാപകമായ പ്രതിഷേധത്തിന് ഇടയാക്കിയ സാഹചര്യത്തിലാണ് സർക്കാരിന്റെ പുതിയ തീരുമാനം. ഏപ്രിൽ ഒന്ന് മുതൽ പഴയതുപോലെ മദ്യത്തിന്റെ അളവ് (Volume) മാത്രം കണക്കിലെടുത്തുള്ള നികുതി രീതിയിലേക്ക് മാറും.
പഴയ നികുതി ഘടനയിലേക്ക് മാറുന്നതോടെ ഏപ്രിൽ 1 മുതൽ വൈൻ ലിറ്ററിന് 0.58 ഡോളർ വർധിക്കും. ഇതനുസരിച്ച് 750 മില്ലി ലിറ്റർ വരുന്ന ഒരു ബോട്ടിൽ വൈനിന് ശരാശരി 3.52 ഡോളർ വരെയാകും നികുതി ചുമത്തുക. വിലകൂടിയ വൈനുകൾക്ക് കൂടുതൽ നികുതി നൽകേണ്ടി വന്നിരുന്ന മുൻപത്തെ രീതി വലിയ സാമ്പത്തിക ബാധ്യത ഉണ്ടാക്കുന്നുവെന്ന് ചൂണ്ടിക്കാട്ടി ‘മെട്രോവിനോ ഫൈൻ വൈൻസ്’ ഉൾപ്പെടെയുള്ള പ്രമുഖ സ്ഥാപനങ്ങൾ രംഗത്തെത്തിയിരുന്നു. ഈ നികുതിയിലൂടെ വർഷം 23 മില്യൺ ഡോളർ വരുമാനം സർക്കാർ ലക്ഷ്യമിട്ടിരുന്നെങ്കിലും ഏകദേശം 10 മില്യൺ ഡോളർ മാത്രമാണ് സമാഹരിക്കാനായത്.
