ഓപ്പൺ വർക്ക് പെർമിറ്റ് പ്രോഗ്രാമുകൾ ഈ വർഷം അവസാനിക്കുമെന്ന റിപ്പോർട്ടുകൾ നിഷേധിച്ച് കാനഡയുടെ ഇമിഗ്രേഷൻ വകുപ്പ് (IRCC). 2026-ഓടെ ഈ പെർമിറ്റുകൾ നിർത്തലാക്കുമെന്ന് ചില ഓൺലൈൻ പോസ്റ്റുകൾ പ്രചരിച്ചിരുന്നു. ഇത്തരം റിപ്പോർട്ടുകൾ തെറ്റാണെന്നും ജനങ്ങളെ തെറ്റിദ്ധരിപ്പിക്കുന്നതാണെന്നും IRCC അറിയിച്ചു. അന്താരാഷ്ട്ര വിദ്യാർത്ഥികൾക്കും തൊഴിലാളികൾക്കും അവരുടെ കുടുംബങ്ങൾക്കും ഈ പെർമിറ്റുകൾ തുടർന്നും ലഭ്യമാകുമെന്ന് അധികൃതർ വ്യക്തമാക്കി.

കാനഡയിലെ ഏത് തൊഴിലുടമയ്ക്ക് കീഴിലും ജോലി ചെയ്യാൻ ആളുകളെ അനുവദിക്കുന്നതാണ് ഓപ്പൺ വർക്ക് പെർമിറ്റുകൾ .അന്താരാഷ്ട്ര വിദ്യാർത്ഥികൾ, താൽക്കാലിക തൊഴിലാളികൾ തുടങ്ങിയവരാണ് ഇവ പ്രധാനമായും ഉപയോഗിക്കുന്നത്. പുതുതായി എത്തുന്നവർക്ക് കാനഡയിലെ പ്രവൃത്തിപരിചയം നേടാൻ ഈ പെർമിറ്റുകൾ ഏറെ സഹായകമാണ്. ഈ പ്രോഗ്രാമുകൾ ഇപ്പോഴും സജീവമാണെന്നും തുടർന്നും പ്രവർത്തിക്കുമെന്നും IRCC വ്യക്തമാക്കി.

പരിഷ്കാരങ്ങളെക്കുറിച്ചുള്ള വിവരങ്ങൾ അറിയാൻ ഔദ്യോഗിക സർക്കാർ വെബ്സൈറ്റുകൾ മാത്രം പരിശോധിക്കണമെന്നും അധികൃതർ അഭ്യർത്ഥിച്ചു.സോഷ്യൽ മീഡിയ വഴി പ്രചരിക്കുന്ന ഇത്തരം അഭ്യൂഹങ്ങൾ വിശ്വസിക്കരുതെന്ന് അവർ മുന്നറിയിപ്പ് നൽകി. രാജ്യത്തിൻ്റെ സമ്പദ്‌വ്യവസ്ഥയെ ശക്തിപ്പെടുത്തുന്നതിനായി തൊഴിലാളികളെ കാനഡ തുടർന്നും സ്വാഗതം ചെയ്യും. നിയമങ്ങളിൽ എന്തെങ്കിലും യഥാർത്ഥ മാറ്റങ്ങൾ ഉണ്ടായാൽ അത് നേരിട്ട് പൊതുജനങ്ങളെ അറിയിക്കുമെന്നും വകുപ്പ് കൂട്ടിച്ചേർത്തു.