ഭാവിയിൽ ഡ്രൈവിംഗ് ലൈസൻസ് പോലും ആവശ്യമില്ലാത്ത ഒരു കാലം വരുമെന്ന് യൂബർ (Uber) പ്രസിഡൻ്റ് ആൻഡ്രൂ മക്ഡൊണാൾഡ്. ഇന്നത്തെ തലമുറയുടെ താല്പര്യങ്ങളിൽ വരുന്ന വലിയ മാറ്റങ്ങളെ മുൻനിർത്തിയാണ് അദ്ദേഹം ഈ നിരീക്ഷണം നടത്തിയത്. മുൻതലമുറകൾ പതിനാറ് വയസ്സ് തികയുമ്പോഴേക്കും ലൈസൻസ് എടുക്കാൻ കാട്ടിയിരുന്ന ആവേശം ഇന്നത്തെ കൗമാരക്കാർക്കിടയിലില്ലെന്ന് അദ്ദേഹം ചൂണ്ടിക്കാട്ടുന്നു.

സ്വന്തമായി ഒരു വാഹനം വാങ്ങുന്നതിനേക്കാൾ, യൂബർ പോലുള്ള റൈഡ്-ഹെയ്‌ലിംഗ് ആപ്പുകളെ ആശ്രയിക്കാനാണ് പുത്തൻ തലമുറയ്ക്ക് താല്പര്യമെന്ന് അദ്ദേഹം പറഞ്ഞു. വരും വർഷങ്ങളിൽ സ്വന്തമായി കാർ വാങ്ങുന്നവരുടെ എണ്ണം ഗണ്യമായി കുറയാനാണ് സാധ്യത. ഗതാഗത രംഗത്തെ ഈ മാറ്റങ്ങൾക്ക് കരുത്തേകാൻ ഡ്രൈവറില്ലാ വാഹനങ്ങളും (Autonomous Vehicles) ഉടൻ സജീവമാകുമെന്നും അദ്ദേഹം വ്യക്തമാക്കി.
ഡ്രൈവർമാർ നിയന്ത്രിക്കുന്ന വാഹനങ്ങളും സ്വയം നിയന്ത്രിത വാഹനങ്ങളും ഒരുമിച്ച് നിരത്തിലിറങ്ങുന്ന ‘ഹൈബ്രിഡ് മൊബിലിറ്റി നെറ്റ്‌വർക്ക്’ എന്ന പുതിയ രീതിയെക്കുറിച്ചും അദ്ദേഹം സംസാരിച്ചു. യാത്രക്കാർക്ക് തങ്ങളുടെ സൗകര്യത്തിനനുസരിച്ച് ഇതിൽ ഏത് വേണമെങ്കിലും തിരഞ്ഞെടുക്കാൻ കഴിയുമെന്ന് അദ്ദേഹം പറഞ്ഞു.

സാങ്കേതികവിദ്യ വളരുന്നതോടെ ഡ്രൈവിംഗ് ലൈസൻസ് എന്നത് വലിയൊരു കാര്യമേ അല്ലാതായി മാറും. അടുത്ത അഞ്ച് വർഷത്തിനുള്ളിൽ തന്നെ ഈ മാറ്റം പ്രകടമാകുമെന്നും, കൂടുതൽ സുരക്ഷിതവും സുഗമവുമായ യാത്രാ സൗകര്യങ്ങൾ ഒരുക്കി ഈ വിപ്ലവത്തിന് നേതൃത്വം നൽകാനാണ് യൂബർ ലക്ഷ്യമിടുന്നതെന്നും അദ്ദേഹം വ്യക്തമാക്കി.