നൂക്ക് (ഗ്രീൻലൻഡ്) : അമേരിക്കയുമായുള്ള തർക്കം മുറുകുന്നതിനിടെ, രാജ്യത്ത് സൈനിക അധിനിവേശത്തിനുള്ള സാധ്യത തള്ളിക്കളയാനാവില്ലെന്ന് ഗ്രീൻലൻഡ് പ്രധാനമന്ത്രി ജെൻസ്-ഫ്രെഡറിക് നീൽസൺ. അപ്രതീക്ഷിതമായി ഉണ്ടായേക്കാവുന്ന ഏതൊരു സാഹചര്യത്തെയും നേരിടാൻ സജ്ജരായിരിക്കണമെന്ന് അദ്ദേഹം ജനങ്ങളോട് അഭ്യർത്ഥിച്ചു. നിലവിൽ യുദ്ധസാധ്യത കുറവാണെങ്കിലും, സുരക്ഷാ മുൻകരുതൽ എന്ന നിലയിൽ ഓരോ വീട്ടിലും ചുരുങ്ങിയത് അഞ്ച് ദിവസത്തേക്കുള്ള ആഹാരപദാർത്ഥങ്ങൾ ശേഖരിച്ചുവെക്കാൻ സർക്കാർ നിർദ്ദേശം നൽകി.

ഗ്രീൻലൻഡ് സ്വന്തമാക്കാനുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ നീക്കങ്ങൾ അന്താരാഷ്ട്ര തലത്തിൽ വലിയ നയതന്ത്ര പ്രതിസന്ധിയാണ് സൃഷ്ടിച്ചിരിക്കുന്നത്. ഇതിന്റെ പശ്ചാത്തലത്തിൽ വിളിച്ചുചേർത്ത വാർത്താസമ്മേളനത്തിലാണ് പ്രധാനമന്ത്രി ജനങ്ങൾക്ക് ജാഗ്രതാ നിർദ്ദേശം നൽകിയത്. “ഒരു സൈനിക സംഘർഷത്തിന് സാധ്യത കുറവാണ്, എങ്കിലും അത് പൂർണ്ണമായും തള്ളിക്കളയാനാവില്ല. ഏത് സാഹചര്യവും നേരിടാൻ നമ്മൾ തയ്യാറാകണം,” നീൽസൺ പറഞ്ഞു. ഗ്രീൻലൻഡ് നാറ്റോ (NATO) സഖ്യത്തിന്റെ ഭാഗമാണെന്നും ഇവിടെയുണ്ടാകുന്ന ഏതൊരു പ്രത്യാഘാതവും ലോകത്തെ മുഴുവൻ ബാധിക്കുമെന്നും അദ്ദേഹം ഓർമ്മിപ്പിച്ചു.

പ്രത്യേക കർമ്മസേന രൂപീകരിക്കും

സാഹചര്യങ്ങൾ വിലയിരുത്തുന്നതിനും ജനങ്ങൾക്ക് കൃത്യമായ മാർഗനിർദ്ദേശങ്ങൾ നൽകുന്നതിനുമായി പ്രത്യേക കർമ്മസേനയെ സർക്കാർ നിയോഗിച്ചു. അത്യാവശ്യ ഘട്ടങ്ങളിൽ പാലിക്കേണ്ട സുരക്ഷാ മാനദണ്ഡങ്ങൾ അടങ്ങിയ ലഘുലേഖകൾ വരും ദിവസങ്ങളിൽ വിതരണം ചെയ്യും. ഗ്രീൻലൻഡിന് മേൽ വലിയ സമ്മർദ്ദമാണ് നിലനിൽക്കുന്നതെന്നും എല്ലാ സാഹചര്യങ്ങളും നേരിടാൻ രാജ്യം ഒരുങ്ങണമെന്നും ധനമന്ത്രി മുട്ടെ ബി. എഗെഡെയും വ്യക്തമാക്കി.

അതേസമയം, ഗ്രീൻലൻഡ് വിഷയത്തിൽ വിട്ടുവീഴ്ചയ്ക്കില്ലെന്ന നിലപാടിലാണ് ഡൊണാൾഡ് ട്രംപ്. ഗ്രീൻലൻഡ് സ്വന്തമാക്കുന്നത് അമേരിക്കയുടെയും ലോകത്തിന്റെയും സുരക്ഷയ്ക്ക് അനിവാര്യമാണെന്ന് സ്വിറ്റ്‌സർലൻഡിലെ ദാവോസിൽ ട്രംപ് ആവർത്തിച്ചു. ഡെന്മാർക്ക് ഗ്രീൻലൻഡിനെ വിൽക്കാൻ തയ്യാറായില്ലെങ്കിൽ യൂറോപ്യൻ രാജ്യങ്ങൾക്കുമേൽ കടുത്ത വ്യാപാര നികുതികൾ ചുമത്തുമെന്നും അദ്ദേഹം ഭീഷണിപ്പെടുത്തി. എന്നാൽ, ഗ്രീൻലൻഡിലേക്ക് സൈന്യത്തെ അയക്കാൻ പെന്റഗണിന് ഇതുവരെ ഔദ്യോഗിക നിർദ്ദേശം ലഭിച്ചിട്ടില്ലെന്നാണ് വൈറ്റ് ഹൗസ് വൃത്തങ്ങൾ നൽകുന്ന സൂചന.