കാനഡ-ചൈന വ്യാപാരബന്ധത്തിലെ പുതിയ മാറ്റങ്ങളിൽ ശുഭ പ്രതീക്ഷയറിയിച്ച് സസ്കാച്ചെവനിലെ കനോല കർഷകർ. പ്രധാനമന്ത്രി മാർക്ക് കാർണിയും പ്രീമിയർ സ്കോട്ട് മോയും നടത്തിയ സംയുക്ത ചൈന സന്ദർശനത്തിന് പിന്നാലെ കനോല നികുതി 15 ശതമാനമായി കുറഞ്ഞതോടെ, തങ്ങൾ അനുഭവിച്ചിരുന്ന അവഗണനയ്ക്ക് അവസാനമായെന്ന് കർഷകർ പറയുന്നു. കഴിഞ്ഞ വർഷം മികച്ച വിളവ് ലഭിച്ചിട്ടും ചൈനീസ് വിപണിയിലെ തടസ്സങ്ങൾ കാരണം അർഹമായ വില ലഭിക്കാതെ പ്രതിസന്ധിയിലായിരുന്ന കർഷകർക്ക് ഈ കരാർ വലിയ സാമ്പത്തിക നേട്ടങ്ങൾക്ക് കളമൊരുക്കുമെന്ന് സസ്കാച്വാനിലെ കർഷക സംഘടനകൾ അഭിപ്രായപ്പെട്ടു.
ഫെഡറൽ സർക്കാരും പ്രവിശ്യാ ഭരണകൂടവും കർഷകരുടെ താൽപ്പര്യങ്ങൾക്കായി ഒരുമിച്ച് നിന്നതിനെ ഏറെ ആവേശത്തോടെ സ്വാഗതം ചെയ്യുന്നതായും അവർ സൂചിപ്പിച്ചു. കനോലയ്ക്ക് അന്താരാഷ്ട്ര വിപണിയിൽ വീണ്ടും ഡിമാൻഡ് വർധിക്കുന്നതോടെ 2026-ൽ കൂടുതൽ സ്ഥലത്തേക്ക് കൃഷി വ്യാപിപ്പിക്കാനുള്ള ഒരുക്കത്തിലാണ് കർഷകർ. പ്രകൃതി കനിയുകയാണെങ്കിൽ ഈ വർഷം കൃഷി ലാഭകരമാകുമെന്നും, പടിഞ്ഞാറൻ കാനഡയിലെ കർഷകരുടെ ശബ്ദം ഫെഡറൽ സർക്കാർ കേട്ടു തുടങ്ങിയതിൽ സന്തോഷമുണ്ടെന്നും കർഷക പ്രതിനിധികൾ വ്യക്തമാക്കി.
