കാനഡയിലെ കുടിയേറ്റ നിയമങ്ങളിൽ വലിയ മാറ്റങ്ങൾ പ്രഖ്യാപിച്ച് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). മാതാപിതാക്കളെയും മുത്തശ്ശീ-മുത്തച്ഛന്മാരെയും കാനഡയിലേക്ക് കൊണ്ടുവരാൻ സഹായിക്കുന്ന ‘പേരന്റ്‌സ് ആൻഡ് ഗ്രാൻഡ്‌ പേരന്റ്‌സ് പ്രോഗ്രാം’ (PGP) വഴി പുതിയ അപേക്ഷകൾ സ്വീകരിക്കുന്നത് കാനഡ താൽക്കാലികമായി നിർത്തുന്നു. കാനഡയുടെ പുതിയ ഇമിഗ്രേഷൻ നയം അനുസരിച്ച് കുടിയേറ്റക്കാരുടെ എണ്ണം പരിമിതപ്പെടുത്തുന്നതിന്റെ ഭാഗമായാണ് ഈ നടപടി.

2026 ജനുവരി 1 മുതൽ പേരന്റ്‌സ് ആൻഡ് ഗ്രാൻഡ്‌പേരന്റ്‌സ് പ്രോഗ്രാമിൽ പുതിയ സ്ഥിരതാമസ (PR) അപേക്ഷകൾ സ്വീകരിക്കില്ല. അടുത്ത അറിയിപ്പ് ഉണ്ടാകുന്നത് വരെ ഈ നിയന്ത്രണം തുടരും. 2025-ൽ ലഭിച്ച സ്പോൺസർഷിപ്പ് അപേക്ഷകൾ മാത്രമേ 2026-ൽ പ്രോസസിംഗിനായി പരിഗണിക്കുകയുള്ളൂ. 2025 മാർച്ച് 13-ലെ മന്ത്രിതല നിർദ്ദേശങ്ങൾ പാലിച്ച അപേക്ഷകർക്ക് മാത്രമായിരിക്കും ഈ ആനുകൂല്യം. 2026ൽ പരമാവധി 10,000 അപേക്ഷകൾ മാത്രമേ പ്രോസസ്സ് ചെയ്യാൻ സർക്കാർ ഉദ്ദേശിക്കുന്നുള്ളൂ. പുതിയ ഉത്തരവുകൾ വന്നില്ലെങ്കിൽ മറ്റ് അപേക്ഷകളൊന്നും 2026-ൽ സ്വീകരിക്കില്ലെന്ന് അധികൃതർ വ്യക്തമാക്കിയിട്ടുണ്ട്.