കാനഡയിൽ സ്ഥിരതാമസത്തിനായി അപേക്ഷിക്കാൻ കൂടുതൽ പേർക്ക് ഇൻവിറ്റേഷൻ നൽകി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). ഡിസംബറിലെ ആദ്യ നറുക്കെടുപ്പിൽ 1,123 എക്സ്പ്രസ് എൻട്രി പ്രൊവിൻഷ്യൽ നോമിനി പ്രോഗ്രാം (PNP) ഉദ്യോഗാർത്ഥികൾക്കാണ് സ്ഥിരതാമസത്തിന് അപേക്ഷിക്കാൻ (ITA – Invitation to Apply) ഇൻവിറ്റേഷൻ നൽകിയത്. ഈ നറുക്കെടുപ്പിൽ പരിഗണിക്കുന്നതിനായി ഉദ്യോഗാർത്ഥികൾക്ക് ഉണ്ടായിരിക്കേണ്ട ഏറ്റവും കുറഞ്ഞ കോംപ്രഹെൻസീവ് റാങ്കിംഗ് സിസ്റ്റം (Comprehensive Ranking System – CRS) സ്കോർ 729 ആയിരുന്നു. 2025 മാർച്ച് 5, യൂണിവേഴ്സൽ കോർഡിനേറ്റഡ് ടൈം (UTC) 05:10:48 ന് മുമ്പ് എക്സ്പ്രസ് എൻട്രി പ്രൊഫൈൽ സൃഷ്ടിച്ചവരെയാണ് ഈ ഡ്രോയിൽ പരിഗണിച്ചത്.‌‌ ഈ വർഷം PNP വിഭാഗത്തിൽ നടന്ന ഏറ്റവും വലിയ നറുക്കെടുപ്പുകളിൽ ഒന്നാണ് ഇന്ന് (ഡിസംബർ 8) നടന്നത്. പ്രൊവിൻഷ്യൽ നോമിനേഷൻ ലഭിച്ച ഉദ്യോഗാർത്ഥികൾക്ക് അവരുടെ CRS സ്കോറിൽ 600 പോയിൻ്റുകൾ അധികമായി ലഭിക്കുന്നതുകൊണ്ടാണ് കട്ട് ഓഫ് സ്കോർ 729-ൽ എത്തിയത്.

ഇതുവരെ, IRCC 2025 ൽ എക്സ്പ്രസ് എൻട്രി സിസ്റ്റം വഴി 95,599 ഐടിഎകൾ നൽകിയിട്ടുണ്ട്. ഈ വർഷത്തെ എക്സ്പ്രസ് എൻട്രി നറുക്കെടുപ്പുകൾ പ്രധാനമായും പ്രൊവിൻഷ്യൽ നോമിനി പ്രോഗ്രാം അപേക്ഷകരെ കേന്ദ്രീകരിച്ചാണ് നടത്തിയിട്ടുള്ളത്. ബാക്കിയുള്ള എക്സ്പ്രസ് എൻട്രി ഐടിഎകൾ CEC, ഫ്രഞ്ച് ഭാഷാ പ്രാവീണ്യമുള്ള ഉദ്യോഗാർത്ഥികൾക്കും, എക്സ്പ്രസ് എൻട്രി മുൻഗണനാ തൊഴിൽ വിഭാഗങ്ങളിലുള്ളവർക്കും വേണ്ടി നീക്കിവെച്ചു.