ശസ്ത്രക്രിയകൾക്കും രോഗനിർണ്ണയത്തിനുമായി കാത്തിരിപ്പ് പട്ടികയിൽ ഉണ്ടായിരുന്ന ആയിരക്കണക്കിന് രോഗികൾ കഴിഞ്ഞ വർഷം മരണപ്പെട്ടതായി കനേഡിയൻ തിങ്ക് ടാങ്ക് റിപ്പോർട്ട് ചെയ്യുന്നു. 2024 ഏപ്രിൽ മുതൽ 2025 മാർച്ച് വരെയുള്ള കാലയളവിൽ വിവിധ പ്രവിശ്യകളിലെ 23,746-ൽ അധികം പേർ ചികിത്സ ലഭിക്കുന്നതിനുമുമ്പ് മരണമടഞ്ഞതായാണ് റിപ്പോർട്ടുകൾ . ഹൃദയ ശസ്ത്രക്രിയ പോലുള്ള അടിയന്തിര ചികിത്സകൾക്കായി കാത്തിരുന്നവരും, ജീവിതനിലവാരം മെച്ചപ്പെടുത്താനുള്ള ലഘുവായ ശസ്ത്രക്രിയകൾക്കായി കാത്തിരുന്നവരും ഇതിൽ ഉൾപ്പെടുന്നു. ഈ കണക്കുകൾ പൂർണമല്ലെന്നും യഥാർത്ഥ സംഖ്യ ഇതിലും വളരെ കൂടുതലായിരിക്കാമെന്നും റിപ്പോർട്ടിൽ പറയുന്നു.
ആരോഗ്യ സംരക്ഷണത്തിനായി രോഗികൾ ദീർഘകാലം കാത്തിരിക്കേണ്ടി വരുന്ന ഈ സാഹചര്യം കാനഡയുടെ ആരോഗ്യപരിപാലന സംവിധാനത്തിൻ്റെ പരാജയമാണ് തെളിയിക്കുന്നതെന്നാണ് വിമർശനം. കാനഡയിലെ ശരാശരി കാത്തിരിപ്പ് സമയം 30 ആഴ്ചയോളമാണ്. ഇത് മുൻ വർഷത്തേക്കാൾ വർധിച്ചിരിക്കുന്നു. ചികിത്സ കിട്ടാതെ മരണപ്പെടുന്ന ഓരോ വ്യക്തിയുടെയും പിന്നിൽ, നഷ്ടപ്പെട്ട പ്രിയപ്പെട്ടവരെക്കുറിച്ചുള്ള വേദനയുമായി ജീവിക്കുന്ന കുടുംബങ്ങളുണ്ട്. ഈ ദുരന്തത്തിന് പരിഹാരം കാണാൻ അടിയന്തിരമായ പരിഷ്കാരങ്ങൾ ആവശ്യമാണെന്ന് ആരോഗ്യ വിദഗ്ധരും രാഷ്ട്രീയക്കാരും ഒരുപോലെ ആവശ്യപ്പെടുന്നു. കാത്തിരിപ്പ് പട്ടികയിലെ മരണങ്ങൾ തടയാനും പൊതുജനങ്ങളുടെ വിശ്വാസം തിരികെ കൊണ്ടുവരാനും ഫലപ്രദമായ ആരോഗ്യനയ രൂപീകരണത്തിലേക്ക് കാനഡ സർക്കാർ കടക്കേണ്ടതുണ്ട് എന്നാണ് വിദഗ്ദ്ധർ പറയുന്നത്.
