സാമൂഹിക, ഭവന അടിസ്ഥാന സൗകര്യങ്ങളെക്കുറിച്ചുള്ള ആശങ്കകൾക്കിടയിൽ, അടുത്ത മൂന്ന് വർഷത്തിനുള്ളിൽ കാനഡയിലേക്കുള്ള സ്ഥിര, താൽക്കാലിക താമസക്കാരുടെ പ്രവേശനം വെട്ടിക്കുറയ്ക്കുമെന്ന് ലിബറൽ സർക്കാർ പ്രഖ്യാപിച്ചു. ചൊവ്വാഴ്ച ഒട്ടാവയിൽ അവതരിപ്പിച്ച 2025 ലെ ഫെഡറൽ ബജറ്റിലാണ് ഈ മാറ്റങ്ങൾ ഉൾപ്പെടുത്തിയിരിക്കുന്നത്.

2026 ലെ താൽക്കാലിക താമസ പ്രവേശന ലക്ഷ്യം 2025 ലെ 673,650 ൽ നിന്ന് 43% കുറച്ചുകൊണ്ട് 385,000 ആക്കും. 2026-ലെ വിദേശ വിദ്യാർത്ഥി പ്രവേശന ലക്ഷ്യം 155,000 ആയിരിക്കും. 2025 ലെ 305,900 ൽ നിന്ന് 49% കുറവ്. താത്കാലിക വിദേശ തൊഴിലാളികളുടെ പ്രവേശന ലക്ഷ്യം 230,000 ആയിരിക്കും – 2025 ലെ ലക്ഷ്യമായ 367,750 ൽ നിന്ന് 37% കുറവ്, എന്നാൽ കഴിഞ്ഞ വർഷത്തെ ഇമിഗ്രേഷൻ ലെവൽസ് പ്ലാനിലെ 210,700 എന്ന 2026-ലെ ലക്ഷ്യത്തിൽ നിന്ന് 8% വർധനയും താത്കാലിക വിദേശ തൊഴിലാളികളുടെ പ്രവേശനത്തിൽ ഉണ്ടായിട്ടുണ്ട്. കൂടാതെ കാനഡയിലെ യോഗ്യരായ സംരക്ഷിത വ്യക്തികൾക്ക് അടുത്ത രണ്ട് വർഷത്തിനുള്ളിൽ സ്ഥിര താമസ പദവി നൽകുമെന്നും ഫെഡറൽ സർക്കാർ പ്രഖ്യാപിച്ചു.

2026-ലെ സ്ഥിര താമസ പ്രവേശന ലക്ഷ്യം കഴിഞ്ഞ വർഷത്തെ പദ്ധതിയിൽ നിന്ന് മാറ്റമില്ലാതെ 380,000 ആയി തുടരും. സ്ഥിര താമസ പ്രവേശനത്തിന്‍റെ 64% സാമ്പത്തിക കുടിയേറ്റത്തിനായി നീക്കിവയ്ക്കാൻ സർക്കാർ പദ്ധതിയിടുന്നു.