ആൽബർട്ട: ആൽബർട്ടയിലെ അധ്യാപക സമരത്തിൽ, ചർച്ചകൾക്കായുള്ള പ്രവിശ്യാ സർക്കാരിൻ്റെ നിർദ്ദേശം തള്ളിക്കളഞ്ഞ് ആൽബർട്ട ടീച്ചേഴ്സ് അസോസിയേഷൻ. മധ്യസ്ഥ ചർച്ചകളിലേക്ക് നീങ്ങുന്നതിനായി ഒക്ടോബർ 20-ന് അധ്യാപകർ തിരികെ ജോലിയിൽ പ്രവേശിക്കണമെന്നായിരുന്നു സർക്കാരിൻ്റെ ആവശ്യം. എന്നാൽ, ഈ നിർദ്ദേശം പക്ഷപാതപരമാണ് എന്നും സർക്കാരിനും സ്കൂൾ ബോർഡുകൾക്കും മാത്രം അനുകൂലമായ ഫലമുണ്ടാക്കാൻ വേണ്ടി രൂപകൽപ്പന ചെയ്തതാണെന്നും ATA പ്രസിഡന്റ് ജേസൺ ഷില്ലിംഗ് പറഞ്ഞു. പ്രശ്നങ്ങളുടെ മൂലകാരണങ്ങൾ പരിഹരിക്കാതെ അധ്യാപകരെ ഭീഷണിപ്പെടുത്തി ജോലിക്ക് തിരികെ കൊണ്ടുവരാനാണ് സർക്കാർ ശ്രമിക്കുന്നതെന്നും അദ്ദേഹം ആരോപിച്ചു.
ക്ലാസുകളുടെ വലുപ്പം, പഠനത്തിൻ്റെ സങ്കീർണ്ണതകൾ തുടങ്ങിയ യഥാർത്ഥ പ്രശ്നങ്ങൾ സർക്കാർ അംഗീകരിക്കണമെന്നാണ് ATA യുടെ ആവശ്യം. ഈ വിഷയങ്ങളിൽ വ്യക്തമായ പരിഹാരങ്ങൾ ഉണ്ടാക്കാതെ സമരത്തിൽ നിന്ന് പിന്നോട്ടില്ലെന്ന് ATA വ്യക്തമാക്കി. അതേസമയം, അധ്യാപകരുടെ ഈ നിലപാട്, ചർച്ചകളിലൂടെ എളുപ്പത്തിൽ ഒത്തുതീർപ്പിൽ എത്താനുള്ള സാധ്യത കുറച്ചിരിക്കുകയാണ്. സമരം നീണ്ടുപോയാൽ, അധ്യാപകരെ ജോലിക്ക് തിരികെ പ്രവേശിപ്പിക്കാൻ സർക്കാർ നിയമനിർമ്മാണം കൊണ്ടുവരാൻ സാധ്യതയുണ്ട്. നിലവിൽ 51,000-ത്തിലധികം അധ്യാപകർ സമരത്തിൽ പങ്കെടുക്കുന്നതിനാൽ 2,500 സ്കൂളുകളിലെ ഏകദേശം 7,40,000 വിദ്യാർത്ഥികളുടെ വിദ്യാഭ്യാസം തടസ്സപ്പെട്ടിരിക്കുകയാണ്. സമരത്തെ തുടർന്ന് വീട്ടിലിരിക്കുന്ന 12 വയസ്സിൽ താഴെയുള്ള കുട്ടികളുടെ രക്ഷിതാക്കൾക്ക് പ്രതിദിനം 30 ഡോളർ ധനസഹായം നൽകാൻ പ്രവിശ്യാ സർക്കാർ തീരുമാനിച്ചിരുന്നു.
