ഓട്ടവ: അമേരിക്കയെ സാമ്പത്തികമായി ആശ്രയിക്കുന്നത് കുറയ്ക്കാൻ കാനഡ വളരെക്കാലം കാത്തിരുന്നുവെന്നും ഇന്ന് അതിൻ്റെ വില നൽകുകയാണെന്നും ബാങ്ക് ഓഫ് കാനഡ ഗവർണർ ടിഫ് മക്ലെം. ആഗോള വ്യാപാര തടസ്സങ്ങളെക്കുറിച്ച് സസ്കാച്ചെവാനിലെ ബിസിനസ്സ് നേതാക്കൾക്ക് മുന്നിൽ പ്രസംഗിക്കുകയായിരുന്നു അദ്ദേഹം. ട്രംപിൻ്റെ താരിഫുകൾ കാനഡയിലെ വ്യാപാര അധിഷ്ഠിത വ്യവസായങ്ങളെ ബാധിച്ചതോടെ സാമ്പത്തിക വളർച്ച താഴ്ന്ന നിലയിൽ എത്തി. കാനഡ പുതിയ ആഗോള വിപണികൾ തേടുകയും ആഭ്യന്തര തടസ്സങ്ങൾ നീക്കുകയും വേണമെന്നും അദ്ദേഹം പറഞ്ഞു.
കഴിഞ്ഞ ആഴ്ച ബാങ്ക് ഓഫ് കാനഡ പലിശ നിരക്ക് 2.5 ശതമാനമായി കുറച്ചിരുന്നു. കയറ്റുമതി കനത്ത തിരിച്ചടി നേരിട്ടതോടെ രണ്ടാം പാദ ജിഡിപിയിലും ഇടിവുണ്ടായി. താരിഫ് ബാധിച്ച വ്യവസായങ്ങളിലെ തൊഴിലവസരങ്ങളിലും കുറവുണ്ടായിട്ടുണ്ട്. യുഎസ് തീരുവകളുടെ ആഘാതം നേരത്തെ ഭയപ്പെട്ടിരുന്നതിനേക്കാൾ കുറവായിരുന്നു എന്ന് മാക്ലെം പറഞ്ഞു, എന്നാൽ മുഴുവൻ പ്രത്യാഘാതങ്ങൾ ഇനിയും പുറത്ത് വന്നിട്ടില്ലെന്നും അദ്ദേഹം മുന്നറിയിപ്പ് നൽകി. ഭാവിയിലെ തകർച്ചയിൽ നിന്ന് സമ്പദ്വ്യവസ്ഥയെ രക്ഷിക്കുന്നതിനുള്ള ആദ്യ ചുവടുവയ്പ്പുകൾ കാനഡ ഇതിനകം തന്നെ ആരംഭിച്ചിട്ടുണ്ടെന്ന് അദ്ദേഹം പറഞ്ഞു.
