എഡ്മന്റൺ: മിക്ക കനേഡിയൻ നഗരങ്ങളെ അപേക്ഷിച്ച് എഡ്മന്റൺ കൂടുതൽ അഫോർഡബിളായ വിലയിൽ തുടരുമ്പോൾ രാജ്യത്തെ ഏറ്റവും കൂടുതലും വേഗത്തിലുമായ വാടക വർധനയും എഡ്മന്റണിലാണെന്ന് റിപ്പോർട്ട്. Rentals.ca യുടെ ഓഗസ്റ്റ് മാസത്തെ റിപ്പോർട്ട് അനുസരിച്ച്, വാടകക്കാർക്ക് ഏറ്റവും ചെലവേറിയ 51 ആമത്തെ നഗരമാണ് എഡ്മന്റൺ. നഗരത്തിൽ ഒരു വൺ ബെഡ്‌റൂം യൂണിറ്റിന് ശരാശരി 1,391 ഡോളറാണ് നിരക്ക്. മുൻ മാസത്തെ അപേക്ഷിച്ച് 1.6 ശതമാനം വർധനവാണ് ഉണ്ടായത്. എന്നാൽ കഴിഞ്ഞ വർഷം ഇതേകാലയളവിനെ അപേക്ഷിച്ച് വിലയിൽ 1.5 ശതമാനം ഇടിവാണ് രേഖപ്പെടുത്തിയത്.

എഡ്മന്റണിലെ ടു ബെഡ്‌റൂം അപ്പാർട്ട്‌മെന്റിന് നിലവിൽ പ്രതിമാസം 1,759 ഡോളർ ചെലവാകും. കഴിഞ്ഞ മാസത്തക്കാൾ 0.8 ശതമാനവും ഒരു വർഷം മുമ്പുള്ളതിനേക്കാൾ 0.6 ശതമാനവും വർധനയാണ് രേഖപ്പെടുത്തിയത്. ആൽബെർട്ടയുടെ തലസ്ഥാനമായ എഡ്മന്റണിൽ കഴിഞ്ഞ മൂന്ന് വർഷത്തിനിടെ വാടക 25.5 ശതമാനം വർധിച്ചു. കാനഡയിലെ ഏറ്റവും വേഗതയേറിയ വളർച്ചയാണിത്. എഡ്മന്റണിന് പിന്നാലെ മോൺട്രിയലിലാണ് ഏറ്റവും വേഗതയേറിയ വാടക നിരക്ക് വളർച്ച. 15.1 ശതമാനമാണ് വർധന രേഖപ്പെടുത്തിയത്.