കാനഡ പോസ്റ്റും പോസ്റ്റല്‍ ജീവനക്കാരെ പ്രതിനിധീകരിക്കുന്ന കനേഡിയന്‍ യൂണിയന്‍ ഓഫ് പോസ്റ്റല്‍ വര്‍ക്കേഴ്സും (CUPW) തമ്മിലുള്ള ചര്‍ച്ച ഇന്ന് പുനഃരാരംഭിക്കും. കരാറിലെത്താന്‍ CUPW യുടെ ഓഫറുകള്‍ പരിശോധിക്കുകയാണെന്നും ഫെഡറല്‍ മധ്യസ്ഥര്‍ വഴി CUPW യുമായി പതിവായി ബന്ധപ്പെടുന്നുണ്ടെന്നും കാനഡ പോസ്റ്റ് വക്താവ് അറിയിച്ചു.

യൂണിയന്‍ മുന്നോട്ടുവച്ച ഓഫറുകള്‍ അവലോകനം ചെയ്യാന്‍ കൂടുതല്‍ സമയം ആവശ്യമാണെന്ന് കാനഡ പോസ്റ്റ് അറിയിച്ചതിനെ തുടര്‍ന്ന് വെള്ളിയാഴ്ച നടത്താന്‍ നിശ്ചയിച്ചിരുന്ന ചര്‍ച്ച തിങ്കളാഴ്ചത്തേക്ക് മാറ്റിവെക്കുകയായിരുന്നു. പുതിയ ഓഫറില്‍ നാല് വര്‍ഷത്തിനുള്ളില്‍ മൊത്തം 19% വേതന വര്‍ധനയാണ് യൂണിയന്‍ ആവശ്യപ്പെടുന്നത്. എന്നാല്‍, നാല് വര്‍ഷത്തിനുള്ളില്‍ ഏകദേശം 13% വേതന വര്‍ധനയും പാര്‍ട്ട് ടൈം തൊഴിലാളികളെ കൂട്ടായ കരാറില്‍ ചേര്‍ക്കുന്നതിനുള്ള പുനഃസംഘടനയുമാണ് കാനഡ പോസ്റ്റ് യൂണിയന് വാഗ്ദാനം ചെയ്തിരുന്നത്.