ഒൻ്റാരിയോ: കാനഡയിൽ ഭവന നിർമ്മാണ മാന്ദ്യമില്ലെന്ന് റോയൽ ബാങ്ക് ഓഫ് കാനഡയുടെ റിപ്പോർട്ട്. എന്നാൽ രാജ്യത്ത് ഏറ്റവും കൂടുതൽ സംഖ്യയുള്ള ഒൻ്റാരിയോയിൽ ഭവനനിർമ്മാണത്തിൽ മാന്ദ്യം ഉള്ളതായും ആർബിസി റിപ്പോർട്ട് പറയുന്നു. കാനഡയിൽ ഭവന നിർമ്മാണത്തിന്റെ വേഗത വർദ്ധിച്ചുകൊണ്ടിരിക്കുകയാണെന്നാണ് പുതിയ പഠനം വ്യക്തമാക്കുന്നത്.
കഴിഞ്ഞ നാല് വർഷത്തിനിടയിലെ ഏറ്റവും ശക്തമായ വളർച്ചയാണ് ഈ വർഷം ഉണ്ടായത്. രാജ്യത്തിന്റെ പല ഭാഗങ്ങളിലും ഇത് ശക്തമായി തുടരുന്നതായും കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ്റെ (CMHC) ഏറ്റവും പുതിയ കണക്കുകൾ വിശകലനം ചെയ്ത് റോയൽ ബാങ്ക് ഓഫ് കാനഡ തയ്യാറാക്കിയ റിപ്പോർട്ടിൽ പറയുന്നു. രാജ്യത്തിന്റെ മറ്റ് ഭാഗങ്ങളിൽ ഭവന നിർമ്മാണത്തിൽ കുതിച്ചുചാട്ടം ഉണ്ടായപ്പോൾ, ഒൻ്റാരിയോയിൽ കുത്തനെയുള്ള ഇടിവ് അനുഭവപ്പെട്ടതായും റിപ്പോർട്ടിലുണ്ട്.
ഗ്രേറ്റർ ടൊറൻ്റോ ഏരിയയിലാണ് കൂടുതൽ ഇടിവുള്ളത്. ഇത് ആശങ്കാജനകമാണന്നും ഈ മേഖലയിലെ ജനങ്ങൾക്ക് സാമൂഹികവും സാമ്പത്തികവുമായ ബുദ്ധിമുട്ടുകൾ ഉണ്ടാക്കുമെന്നും ആർബിസി സാമ്പത്തിക വിദഗ്ദ്ധനായ റോബർട്ട് ഹോഗിന്റെ റിപ്പോർട്ട് പറയുന്നു. കാനഡയിലെ ഭവന പ്രതിസന്ധിയുടെ മൂലകാരണം ഒൻ്റാരിയോയിലെ നിർമ്മാണത്തിലുണ്ടാകുന്ന കാലതാമസമാണെന്നും റിപ്പോർട്ടിൽ പറയുന്നു.
