ടൊറൻ്റോ: പ്രവിശ്യയിൽ തുടർച്ചയായി മൂന്നാം ആഴ്ചയും ഡസൻ കണക്കിന് അഞ്ചാംപനി കേസുകൾ കൂടി റിപ്പോർട്ട് ചെയ്തതായി പബ്ലിക് ഹെൽത്ത് ഒൻ്റാരിയോ. കഴിഞ്ഞ ആഴ്ച പ്രവിശ്യയിൽ 96 പുതിയ അഞ്ചാംപനി കേസുകൾ റിപ്പോർട്ട് ചെയ്തു. ഇതോടെ ഒക്ടോബർ മുതലുള്ള അഞ്ചാംപനി രോഗബാധിതരുടെ എണ്ണം 2,179 ആയി.
പുതിയ അണുബാധകളിൽ മുപ്പത്തിനാല് എണ്ണം സൂ സെ മാരി ഉൾപ്പെടുന്ന അൽഗോമ പബ്ലിക് ഹെൽത്തിലാണ്. കഴിഞ്ഞ ആഴ്ച, ഈ മേഖലയിൽ 28 പുതിയ അണുബാധകൾ റിപ്പോർട്ട് ചെയ്തിരുന്നു. ഇതോടെ നോർത്തേൺ ഒൻ്റാരിയോയിലെ കേസുകളുടെ എണ്ണം 115 ആയി ഉയർന്നു. ഈ വർധന പ്രതീക്ഷിച്ചിരുന്നതാണെന്ന് അൽഗോമ പബ്ലിക് ഹെൽത്ത് അസോസിയേറ്റ് മെഡിക്കൽ ഓഫീസറായ ഡോ. ജോൺ ട്യൂണെമ പറയുന്നു. അതേസമയം കഴിഞ്ഞ ഏഴ് മാസത്തിനിടെ അഞ്ചാംപനിയുടെ പ്രവിശ്യയിലെ പ്രധാന കേന്ദ്രമായി കണക്കാക്കുന്ന സൗത്ത് വെസ്റ്റേൺ പബ്ലിക് ഹെൽത്തിൽ ആകെ 751 കേസുകൾ രേഖപ്പെടുത്തിയിട്ടുണ്ട്. ഇതിൽ 12 പുതിയ അണുബാധിതരും ഉൾപ്പെടുന്നു.
