വാൻകുവർ: വാടകനിരക്കിൽ ഇടിവ് തുടരുകയാണെങ്കിലും കാനഡയിലെ ഏറ്റവും ചെലവേറിയ നഗരം തന്നെയാണ് വാൻകുവർ. സിറ്റിയിൽ അപ്പാർട്ട്മെന്റ് വാടക തുടർച്ചയായി 14 മാസത്തേക്ക് കുറഞ്ഞതായാണ് Rentals.caയുടെ റിപ്പോർട്ട്. ജനുവരിയിൽ പ്രതിവർഷം 5.2 ശതമാനം കുറഞ്ഞ് ശരാശരി 2,896 ഡോളറായി. 2023 ജൂലൈയിൽ 3,340 ഡോളർ എന്ന റെക്കോർഡ് ഉയർന്ന നിരക്കിലെത്തിയതിനു ശേഷം വാൻകൂവറിലെ വാടക മൊത്തം 13 ശതമാനം കുറഞ്ഞുവെന്നും റിപ്പോർട്ടിൽ വ്യക്തമാക്കുന്നു.
എന്നാൽ, വാടക നിരക്കിൽ ഇടിവ് രേഖപ്പെടുത്തുന്നുണ്ടെങ്കിലും കാനഡയിലെ മറ്റ് നഗരങ്ങളെ അപേക്ഷിച്ച് നിരക്ക് കൂടുതൽ വാൻകുവറിൽ തന്നെയാണ്. രാജ്യത്ത് ഏറ്റവും ചെലവേറിയ നഗരമായി തുടരുകയാണ് വാൻകുവർ. വാൻകുവറിന് തൊട്ടുപിന്നാലെ ടൊറന്റോയും ബേണബിയുമാണ് വാടക നിരക്ക് കൂടുതലുള്ള നഗരങ്ങൾ. വിക്ടോറിയ പട്ടികയിൽ ആദ്യ പത്തിലുണ്ട്.
രാജ്യത്തെ ശരാശരി വാടക നിരക്ക് 2,100 ഡോളറായി കുറഞ്ഞ് 18 മാസത്തെ ഏറ്റവും താഴ്ന്ന നിലയിലെത്തിയതായാണ് റിപ്പോർട്ട്. ജനുവരിയിൽ രാജ്യവ്യാപകമായി വാടക നിരക്കിൽ ഇടിവ് രേഖപ്പെടുത്തിയിട്ടുണ്ട്. കഴിഞ്ഞ വർഷത്തെ അപേക്ഷിച്ച് 4.4 ശതമാനം ഇടിവാണ് റിപ്പോർട്ട് ചെയ്തിരിക്കുന്നത്.
