ബഹ്റൈനിലെ മനാമയില് താമസ കെട്ടിടത്തിന് നേരെ ഇറാന് നടത്തിയ ഡ്രോണ് ആക്രമണത്തില് 29 വയസ്സുള്ള സ്വദേശി വനിത കൊല്ലപ്പെട്ടു. ആക്രമണത്തില് എട്ടു പേര്ക്ക് പരുക്കേറ്റതായി ബഹ്റൈന് ആഭ്യന്തര മന്ത്രാലയം സ്ഥിരീകരിച്ചു. സിത്ര മേഖലയില് കഴിഞ്ഞ ദിവസം പുലര്ച്ചെ നടന്ന സമാനമായ ആക്രമണത്തില് രണ്ട് മാസം പ്രായമുള്ള കുഞ്ഞ് ഉള്പ്പെടെ 32 പേർക്ക് പരുക്കേറ്റതായും റിപ്പോര്ട്ടുകളുണ്ട്. പശ്ചിമേഷ്യയില് സംഘര്ഷം പുകയുന്നതിനിടെയുണ്ടായ ഈ നീക്കം വലിയ ആശങ്കയ്ക്കാണ് വഴിതുറന്നിരിക്കുന്നത്.
ആരോഗ്യ മന്ത്രാലയത്തിന്റെ കണക്കുകള് പ്രകാരം പരിക്കേറ്റവരില് നാലുപേരുടെ നില അതീവ ഗുരുതരമാണ്. ഇതില് അടിയന്തര ശസ്ത്രക്രിയയ്ക്ക് വിധേയരാക്കിയ കൊച്ചു കുട്ടികളും ഉള്പ്പെടുന്നു. 17 വയസ്സുകാരിയായ പെണ്കുട്ടിക്ക് തലയ്ക്കും കണ്ണിനും മാരകമായി പരിക്കേറ്റിട്ടുണ്ട്. കൂടാതെ ഏഴും എട്ടും വയസ്സുള്ള രണ്ട് കുട്ടികളുടെ കാലുകള്ക്കും സാരമായ പരിക്കേറ്റതായാണ് ആശുപത്രി അധികൃതര് നല്കുന്ന വിവരം. പരിക്കേറ്റവരെയെല്ലാം വിദഗ്ധ ചികിത്സയ്ക്കായി വിവിധ ആശുപത്രികളില് പ്രവേശിപ്പിച്ചിരിക്കുകയാണ്.
