വിൻസർ/ഡെട്രോയിറ്റ്: കാനഡയിലെ വിൻസറിനെയും അമേരിക്കയിലെ ഡെട്രോയിറ്റിനെയും ബന്ധിപ്പിക്കുന്ന ഗോർഡി ഹൗ അന്താരാഷ്ട്ര പാലത്തിന്റെ ഉദ്ഘാടന തീയതി നിശ്ചയിക്കുന്നതിൽ അനിശ്ചിതത്വം തുടരുന്നു. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭാഗത്തുനിന്നുള്ള പ്രതിഷേധങ്ങൾ ഒഴിവാക്കുന്നതിനായി ഉദ്ഘാടന തീയതി രഹസ്യമായി ചർച്ച ചെയ്യുകയാണെന്ന് ഉന്നത വൃത്തങ്ങളെ ഉദ്ധരിച്ച് സിടിവി ന്യൂസ് റിപ്പോർട്ട് ചെയ്തു. 2026 വസന്തകാലത്ത് പാലം തുറക്കാനാണ് നേരത്തെ ലക്ഷ്യമിട്ടിരുന്നതെങ്കിലും നിലവിലെ രാഷ്ട്രീയ സാഹചര്യങ്ങൾ ഇതിന് വെല്ലുവിളിയാകുന്നു.
പാലത്തിന്റെ നിർമ്മാണത്തിനായി അമേരിക്ക നൽകിയ തുകയ്ക്ക് കാനഡ പൂർണ്ണമായും നഷ്ടപരിഹാരം നൽകുന്നത് വരെ പാലം തുറക്കാൻ അനുവദിക്കില്ലെന്ന് ഫെബ്രുവരിയിൽ ട്രംപ് ഭീഷണി മുഴക്കിയിരുന്നു. കാനഡയുടെ ഉടമസ്ഥതയിലുള്ള ഈ പാലം അമേരിക്കയ്ക്ക് സാമ്പത്തികമായി ഗുണകരമല്ലെന്നും ട്രേഡ് പോളിസികളിൽ കാനഡ വിട്ടുവീഴ്ച ചെയ്യണമെന്നുമാണ് വൈറ്റ് ഹൗസിന്റെ നിലപാട്. ഈ പശ്ചാത്തലത്തിൽ, ഉദ്ഘാടന തീയതി ഔദ്യോഗികമായി പ്രഖ്യാപിക്കുന്നത് ട്രംപിനെ കൂടുതൽ പ്രകോപിപ്പിക്കുമോ എന്ന ഭയത്തിലാണ് കനേഡിയൻ അധികൃതർ.
ഏകദേശം 640 കോടി ഡോളർ ചിലവിൽ നിർമ്മിച്ച പാലത്തിന്റെ പ്രധാന ജോലികളെല്ലാം പൂർത്തിയായിക്കഴിഞ്ഞു. നിലവിൽ ടോളിംഗ് സിസ്റ്റം, ട്രാഫിക് മാനേജ്മെന്റ്, ലൈറ്റിംഗ് എന്നിവയുടെ പരിശോധനകൾ നടന്നു വരികയാണ്. നിർമ്മാണം പൂർത്തിയായിട്ടും ഉദ്ഘാടന തീയതി പ്രഖ്യാപിക്കാത്തതിൽ വിൻസറിലെയും ഡെട്രോയിറ്റിലെയും ജനങ്ങൾക്കിടയിൽ പ്രതിഷേധം ഉയരുന്നുണ്ട്. എന്നാൽ, അമേരിക്കയുമായുള്ള നയതന്ത്ര ബന്ധം വഷളാകാതിരിക്കാൻ ഗ്ലോബൽ അഫയേഴ്സ് കാനഡ അതീവ ജാഗ്രതയോടെയാണ് നീങ്ങുന്നത്. നയതന്ത്ര തലത്തിലുള്ള ചർച്ചകൾ പൂർത്തിയായ ശേഷം മാത്രമേ കൃത്യമായ ഒരു തീയതി പുറത്തുവിടാൻ സാധ്യതയുള്ളൂ.
