കുടുംബത്തോടൊപ്പമുള്ള ഭാഗിക മേൽനോട്ടത്തിലുള്ള സന്ദർശനത്തിനിടെയാണ് കുട്ടികളെ തട്ടിക്കൊണ്ടുപോയത്. മിഡ്‌ലാൻഡ് അവന്യൂ, എഗ്ലിന്റൺ അവന്യൂ ഈസ്റ്റ് (Midland Avenue and Eglinton Avenue East) പ്രദേശത്ത് നിന്ന് അമ്മ തട്ടിക്കൊണ്ടുപോയതായി സംശയിക്കുന്ന മൂന്ന് കുട്ടികളെ കണ്ടെത്തുന്നതിന് ടൊറന്റോ പോലീസ് പൊതുജനങ്ങളുടെ സഹായം തേടി. ഡാനിയൽ (6), ഐറിന (3), നാല് മാസം പ്രായമുള്ള അനസ്താസിയ എന്നീ കുട്ടികൾ വെള്ളിയാഴ്ച ഒരു ബന്ധുവിനൊപ്പം ഭാഗിക മേൽനോട്ടത്തിലുള്ള സന്ദർശനത്തിലായിരുന്നപ്പോൾ അമ്മ കുട്ടികളെയും കൊണ്ട് അവിടെ നിന്ന് കടന്നുകളയുകയായിരുന്നുവെന്ന് പോലീസ് ശനിയാഴ്ച അറിയിച്ചു.

കുട്ടികളുടെ അമ്മയായ സമെർദ മിക്ലെസ്‌ക്യു (Somerda Miclescu – 22), ഒന്റാറിയോ ലൈസൻസ് പ്ലേറ്റ് DJJS 875 ഉള്ള 2017 മോഡൽ വെള്ള ഫോർഡ് എക്സ്പെഡിഷൻ (White Ford Expedition SUV) കാറിലാണ് സഞ്ചരിക്കുന്നതെന്ന് കരുതപ്പെടുന്നതായി പോലീസ് പറഞ്ഞു. അമ്മയ്ക്ക് കുട്ടികളുടെ നിയമപരമായ കസ്റ്റഡി അവകാശമില്ലെന്നും ഇവർ ഇപ്പോൾ എവിടെയാണെന്ന് വ്യക്തമല്ലെന്നും പോലീസ് വ്യക്തമാക്കി. 5 അടി 7 ഇഞ്ച് ഉയരവും ഏകദേശം 180 പൗണ്ട് ഭാരവും നീളമുള്ള കറുത്ത മുടിയുമുള്ള സ്ത്രീയാണ് സമെർദ. നീളമുള്ള കറുത്ത സ്കർട്ടും ഇരുണ്ട നിറത്തിലുള്ള ടോപ്പുമായിരുന്നു അവസാനമായി കാണുമ്പോൾ ഇവരുടെ വേഷം. വെള്ളിയാഴ്ച രാവിലെ 11:30 ഓടെയാണ് മിഡ്‌ലാൻഡ് അവന്യൂ, എഗ്ലിന്റൺ അവന്യൂ ഈസ്റ്റ് പ്രദേശത്ത് നിന്ന് കുട്ടികളെ തട്ടിക്കൊണ്ടുപോയെന്ന ഫോൺ സന്ദേശം പോലീസിന് ലഭിക്കുന്നത്.

മിക്ലെസ്‌ക്യു കടന്നുകളഞ്ഞ വാഹനം 25-കാരനായ അയോനട്ട് സ്ട്രോ (Ionut Stroe) എന്നയാളുടേതാണ്. ഈ വാഹനത്തിന്റെ ഉടമ എന്ന നിലയിൽ ഇയാളെയും കേസുമായി ബന്ധപ്പെട്ട് പോലീസ് തിരയുന്നുണ്ട്. കുട്ടികളെ തട്ടിക്കൊണ്ടുപോയ സംഭവവുമായി നേരിട്ട് ബന്ധമില്ലെങ്കിലും, ജാമ്യവ്യവസ്ഥകൾ ലംഘിച്ചതുമായി ബന്ധപ്പെട്ട നാല് കേസുകളിൽ ഇയാളെ നിലവിൽ പോലീസ് തിരയുന്നുണ്ട്. 5 അടി 11 ഇഞ്ച് ഉയരവും 235 പൗണ്ട് ഭാരവും വലത് കൈത്തണ്ടയിൽ ടാറ്റൂവുമുള്ള വ്യക്തിയാണ് ഇയാളെന്ന് പോലീസ് വിശേഷിപ്പിച്ചു. നിലവിൽ ആംബർ അലേർട്ടുകൾ (Amber Alerts) ഒന്നും പുറപ്പെടുവിച്ചിട്ടില്ലെന്ന് ഇൻസ്‌പെക്ടർ ജെഫ് അല്ലിംഗ്ടൺ ശനിയാഴ്ച വാർത്താ സമ്മേളനത്തിൽ അറിയിച്ചു. ഇവരെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ 416-808-4100 എന്ന നമ്പറിൽ പോലീസുമായി നേരിട്ട് ബന്ധപ്പെടണമെന്ന് അഭ്യർത്ഥിച്ചിട്ടുണ്ട്.