ന്യൂയോർക്ക് നഗരത്തിലെ മാൻഹട്ടനിലുള്ള ഐക്യരാഷ്ട്രസഭാ ആസ്ഥാനത്തിന് മുന്നിൽ വ്യാഴാഴ്ച വൈകുന്നേരം ഒരു തിബറ്റൻ പ്രതിഷേധക്കാരൻ സ്വയം തീക്കൊളുത്തി. തിബറ്റൻ പതാകയേന്തി എത്തിയ ഇയാൾ പ്രതിഷേധ സൂചനയായാണ് ഈ ദാരുണമായ കൃത്യം ചെയ്തതെന്ന് ഉദ്യോഗസ്ഥരും പ്രാദേശിക മാധ്യമങ്ങളും റിപ്പോർട്ട് ചെയ്തു. ഏകദേശം 20 വർഷമായി അമേരിക്കയിൽ താമസിക്കുന്ന ‘ലോബ്ഗ റാങ്സെൻ’ എന്ന വ്യക്തിയാണ് ഇതെന്ന് സുഹൃത്തുക്കൾ തിരിച്ചറിഞ്ഞിട്ടുണ്ട്. ന്യൂയോർക്ക് പോസ്റ്റിന്റെ റിപ്പോർട്ട് പ്രകാരം വൈകുന്നേരം ഏഴ് മണിയോടെ ഈസ്റ്റ് 43-ാം സ്ട്രീറ്റിനും ഫസ്റ്റ് അവന്യൂവിനും സമീപമാണ് സംഭവം നടന്നത്.
പരമ്പരാഗത സന്യാസി വസ്ത്രം ധരിച്ചെത്തിയ റാങ്സെൻ, തിരക്കേറിയ തെരുവിന്റെ വശത്തുള്ള നടപ്പാതയിൽ തിബറ്റൻ പതാക സ്ഥാപിച്ച ശേഷമാണ് സ്വയം തീക്കൊളുത്തിയത്. നിമിഷങ്ങൾക്കകം തീ പടർന്നുപിടിച്ച ഇയാൾ റോഡിലേക്ക് വീഴുകയായിരുന്നു. ഈ സമയം നിരവധി വാഹനങ്ങൾ ഹോൺ മുഴക്കിക്കൊണ്ട് ഇതിലൂടെ കടന്നുപോകുന്നുണ്ടായിരുന്നു. സംഭവസ്ഥലത്തേക്ക് ഓടിയെത്തിയ പോലീസ് ഉദ്യോഗസ്ഥരും സുരക്ഷാ ജീവനക്കാരും ചേർന്ന് പതിനഞ്ച് സെക്കൻഡിനുള്ളിൽ തീയണച്ചെങ്കിലും ഗുരുതരമായി പൊള്ളലേറ്റ ഇയാളെ ബെല്ലെവൂ ഹോസ്പിറ്റലിൽ എത്തിച്ചപ്പോഴേക്കും മരണം സംഭവിച്ചിരുന്നു.
സംഭവത്തിന് ശേഷം പോലീസ് പ്രദേശം വളയുകയും അന്വേഷണം ആരംഭിക്കുകയും ചെയ്തു. ഇതിനിടയിൽ ഇയാൾ കൊണ്ടുവന്ന തിബറ്റൻ പതാക ഒരു മണിക്കൂറോളം അവിടെത്തന്നെ ഉണ്ടായിരുന്നു. തിബറ്റൻ സ്വാതന്ത്ര്യ സമരങ്ങളുമായി ബന്ധപ്പെട്ട് സാധാരണയായി ഉപയോഗിക്കാറുള്ള “ചൈന തിബറ്റിൽ നിന്ന് പുറത്തുപോവുക” എന്ന മുദ്രാവാക്യം അടങ്ങിയ ലഘുലേഖകൾ പോലീസ് സംഭവസ്ഥലത്തുനിന്ന് കണ്ടെടുത്തു. അന്ന് നിശ്ചയിച്ചിരുന്ന ഔദ്യോഗിക യോഗങ്ങളെല്ലാം അവസാനിച്ച ശേഷമാണ് ഈ സംഭവം നടന്നതെന്ന് യു.എൻ വക്താവ് അറിയിച്ചു. ചൈനീസ് ഭരണത്തിനെതിരെയുള്ള പ്രതിഷേധത്തിന്റെ ഭാഗമായി 2009 മുതൽ ഇതുവരെ 150-ലധികം തിബറ്റുകാർ സ്വയം തീക്കൊളുത്തിയിട്ടുണ്ടെന്നാണ് ‘ഫ്രീ തിബറ്റ്’ എന്ന സംഘടനയുടെ കണക്കുകൾ വ്യക്തമാക്കുന്നത്.
