ഓട്ടവ: കാനഡയിൽ ആയിരക്കണക്കിന് ലാൻഡ് റോവർ ഡിസ്കവറി എസ്‌യുവികൾ തിരിച്ചു വിളിച്ചു. യാത്രക്കിടെ ഈ വാഹനങ്ങളുടെ പിൻ ഡോറുകൾ തനിയെ തുറന്ന് അപകടത്തിന് കാരണമാകുന്നതായി കണ്ടെത്തിയതിനെ തുടർന്നാണ് നടപടിയെന്ന് ട്രാൻസ്പോർട്ട് കാനഡ അറിയിച്ചു. 2017, 2018, 2019, 2020 മോഡൽ 2,529 ലാൻഡ് റോവർ ഡിസ്കവറി എസ്‌യുവികളാണ് ബാധിക്കപ്പെട്ടിട്ടുള്ളത്.
ഈ വാഹനങ്ങളുടെ പിൻ ഡോറുകൾ അടയ്ക്കുമ്പോൾ ശരിയായി ലോക്ക് വീഴാതെ ഇരിക്കുകയും ഡ്രൈവിങ് സമയത്ത് ഡോറുകൾ പെട്ടെന്ന് തുറന്ന് അപകടത്തിന് കാരണമാകുന്നതായും ഫെഡറൽ ഏജൻസി അറിയിച്ചു. ഈ തകരാർ ബാധിച്ച ലാൻഡ് റോവർ ഉടമകളെ മെയിൽ വഴി അറിയിക്കുകയും പ്രശ്നപരിഹാരത്തിനായി അവരുടെ വാഹനം ഡീലർഷിപ്പിലേക്ക് കൊണ്ടുവരാൻ നിർദ്ദേശിക്കുമെന്നും ട്രാൻസ്പോർട്ട് കാനഡ അറിയിച്ചു. ഡീലർഷിപ്പിൽ എത്തിക്കുന്ന വാഹനത്തിൻറെ അൺലാച്ച് കീലെസ് വെഹിക്കിൾ എൻട്രി ഫങ്ക്ഷൻ പ്രവർത്തനരഹിതമാക്കുമെന്ന് കമ്പനി അറിയിച്ചു.
