ക്രിമിനൽ പശ്ചാത്തലമുള്ള വ്യക്തികൾക്ക് പൗരത്വം നൽകുകയോ നിഷേധിക്കുകയോ ചെയ്തതിനെക്കുറിച്ചുള്ള വിവരങ്ങൾ കാനഡയുടെ കുടിയേറ്റ വകുപ്പിൻ്റെ പക്കലില്ലെന്ന് സർക്കാർ. കൺസർവേറ്റീവ് എംപി മിഷേൽ റെംപെൽ ഗാർണർ ഉന്നയിച്ച ചോദ്യത്തിന് മറുപടിയായാണ് ഇക്കാര്യം വെളിപ്പെടുത്തിയത്. ക്രിമിനൽ റെക്കോർഡുകളുള്ള എത്ര പൗരത്വ അപേക്ഷകൾ അംഗീകരിക്കുകയോ നിരസിക്കുകയോ ചെയ്തു എന്ന് സർക്കാരിന് വ്യക്തമാക്കാൻ കഴിയില്ല.
കുറ്റകൃത്യങ്ങളുടെ പേരിൽ ഒരാൾക്ക് പൗരത്വം നിഷേധിക്കാൻ ‘പൗരത്വ നിയമം’അനുവാദം നൽകുന്നുണ്ട്. കള്ളം പറയുകയോ രേഖകൾ മറച്ചുവെക്കുകയോ ചെയ്യുന്നത് ഉൾപ്പെടെയുള്ള മറ്റ് കാരണങ്ങൾകൊണ്ടും പൗരത്വം നിഷേധിക്കപ്പെടാം. യുദ്ധക്കുറ്റങ്ങൾ ഉൾപ്പെടെ കാനഡയ്ക്ക് പുറത്തുള്ള കുറ്റകൃത്യങ്ങളിൽ പങ്കെടുത്തവർക്കും പൗരത്വം നിഷേധിക്കപ്പെടാം. 2019-നും 2025-നും ഇടയിൽ 1.8 ദശലക്ഷത്തിലധികം പൗരത്വ അപേക്ഷകളാണ് കാനഡയ്ക്ക് ലഭിച്ചത്. മിക്ക അപേക്ഷകളും അംഗീകരിച്ചു, ഏകദേശം 11,000 എണ്ണം മാത്രമാണ് നിരസിച്ചത്. നിരസിച്ചതിൽ ഏകദേശം 2,500 എണ്ണം ക്രിമിനൽ പശ്ചാത്തലം മൂലമായിരുന്നു, എന്നാൽ കൃത്യമായ കാരണങ്ങൾ വ്യക്തമല്ല.
ഇത്തരം സുപ്രധാന വിവരങ്ങൾ കുടിയേറ്റ വകുപ്പിൻ്റെ കൈവശമില്ലാത്തതിൽ റെംപെൽ ഗാർണറെപ്പോലുള്ള നേതാക്കൾ കടുത്ത ആശങ്ക രേഖപ്പെടുത്തി. കഴിഞ്ഞ വർഷം, അഹമ്മദ് ഫൗദ് മുസ്തഫ എൽഡിഡി എന്നയാൾ ഐസിസ് ഭീകരാക്രമണ ഗൂഢാലോചനയുമായി ബന്ധപ്പെട്ട് അറസ്റ്റിലാകുന്നതിന് തൊട്ടുമുമ്പ് കനേഡിയൻ പൗരത്വം നേടിയിരുന്നു. ഫ്രഞ്ച് ഇന്റലിജൻസ് ഏജൻസികളിൽ നിന്നാണ് ഈ ഭീഷണിയെക്കുറിച്ച് കാനഡ അറിഞ്ഞത്.
