കാനഡയില്‍ കരടിയുടെ ആക്രമണത്തില്‍ കൊല്ലപ്പെട്ട കോഴിക്കോട് സ്വദേശി മാര്‍ഷ്യല്‍ ആര്‍ട്‌സ് താരം കെ. ഹൃഷികേശിന്‍റെ (27) സംസ്‌കാരം നടന്നു. മാവൂര്‍ റോഡ് ജംക്ഷന് സമീപം കോലോത്ത് വീട്ടില്‍ ഹൃഷികേശിന്‍റെ മൃതദേഹം കാനഡയില്‍ നിന്ന് വിമാനമാര്‍ഗ്ഗം ഇന്ന് പുലര്‍ച്ചെയാണ് നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ എത്തിച്ചത്. ഉച്ചകഴിഞ്ഞ് മാവൂര്‍ റോഡ് സ്മൃതിപഥം ശ്മശാനത്തിയിരുന്നു സംസ്കാര ചടങ്ങുകൾ. മാവൂര്‍ റോഡ് ജംക്ഷനില്‍ ഹൈസണ്‍ ഹോട്ടലിനു പിന്‍വശം കോലോത്ത് വീട്ടില്‍ കെ.രതീഷിന്‍റെയും (മൊമെന്റോ വേള്‍ഡ്, മാവൂര്‍ റോഡ്) പി. തുളസിയുടെയും മകനാണ്. സഹോദരങ്ങള്‍: അര്‍ജുന്‍, ശ്രീശങ്കര്‍.
കഴിഞ്ഞ മേയ് എട്ടിന് വടക്കന്‍ സസ്‌കച്വാനിലെ യുറേനിയം ഖനന മേഖലയില്‍ വെച്ചായിരുന്നു ഹൃഷികേശ് കൊല്ലപ്പെട്ടത്. വന്‍കൂവര്‍ ആസ്ഥാനമായി പ്രവര്‍ത്തിക്കുന്ന യുറേനിയം എക്‌സ് ഡിസ്‌കവറി കോര്‍പ്പറേഷനില്‍ കരാര്‍ അടിസ്ഥാനത്തില്‍ ടെക്‌നീഷ്യനായി ജോലി ചെയ്തുവരികയായിരുന്നു. പ്രൊജക്ട് സൈറ്റില്‍ വെച്ച് അപ്രതീക്ഷിതമായി ഉണ്ടായ കരടിയുടെ ആക്രമണമത്തിലാണ് ഹൃഷികേശ് കൊല്ലപ്പെട്ടത്. മിക്‌സ്ഡ് മാര്‍ഷ്യല്‍ ആര്‍ട്‌സില്‍ (MMA) ദേശീയ മെഡല്‍ ജേതാവായിരുന്ന ഹൃഷികേശ് മൂന്ന് വര്‍ഷം മുന്‍പാണ് കാനഡയിലേക്ക് കുടിയേറിയത്. മൂത്ത സഹോദരന്‍ കെ. അര്‍ജുനൊപ്പം ബ്രിട്ടിഷ് കൊളംബിയയിലെ പെന്റിങ്ടണിലായിരുന്നു താമസം. തുടര്‍പഠനത്തിനായി വെസ്റ്റേണ്‍ സര്‍വകലാശാലയില്‍ ചേരാനിരിക്കെയാണ് ഹൃഷികേശ് ഈ കരാര്‍ ജോലിക്കായി പ്രൊജക്ട് സൈറ്റിലേക്ക് പോയത്.
