ഓട്ടവ: രാജ്യാന്തര പ്രതിഭകളെയും സന്ദർശകരെയും സ്വാഗതം ചെയ്യുന്നതിനുള്ള കാനഡയുടെ നിരന്തരമായ പ്രതിബദ്ധത ഉയർത്തിക്കാട്ടി എട്ടു ലക്ഷത്തിലധികം പുതിയ താൽക്കാലിക താമസക്കാരെ സ്വാഗതം ചെയ്തതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). ഈ വർഷത്തെ ആദ്യ മൂന്ന് മാസങ്ങളിൽ, സ്റ്റഡി പെർമിറ്റുകൾ, വർക്ക് പെർമിറ്റുകൾ, സന്ദർശക വീസകൾ എന്നിവയുൾപ്പെടെ 834,010 താൽക്കാലിക താമസ അപേക്ഷകൾക്കാണ് കാനഡ അംഗീകാരം നൽകിയത്. ഇതിൽ പുതിയ അപേക്ഷകളും ഉൾപ്പെടുന്നു. എന്നാൽ, പുതിയ താൽക്കാലിക താമസ അപേക്ഷകളിലെ ഈ കുതിച്ചുചാട്ടം കാരണം നിലവിലുള്ള ചില അപേക്ഷകളിൽ കൂടുതൽ പ്രോസസ്സിങ് സമയവും നീക്കം ചെയ്യൽ അറിയിപ്പുകളും നേരിടേണ്ടിവരുന്നുണ്ട്. ഇത് കാനഡയുടെ ഇമിഗ്രേഷൻ സംവിധാനത്തിലെ പിരിമുറുക്കങ്ങൾ എടുത്തുകാണിക്കുന്നു.
പുതിയ താൽക്കാലിക താമസക്കാരെ സ്വാഗതം ചെയ്തതിൽ ഏറ്റവും വലിയ വിഭാഗം ഇന്ത്യന് പൗരന്മാരാണ്. മൊത്തം അപേക്ഷകളിൽ 23 ശതമാനമാണ് ഇന്ത്യക്കാര്. 382,055 ഇന്ത്യൻ പൗരന്മാരുടെ അപേക്ഷകൾ പ്രോസസ്സ് ചെയ്തു. അതിൽ പ്രധാന ഭാഗം സ്റ്റഡി പെർമിറ്റുകളും വർക്ക് പെർമിറ്റുകളുമാണ്. കാനഡയുടെ ടെക്, ഹെൽത്ത് കെയർ മേഖലകളിൽ അവസരങ്ങൾ തേടുന്ന ഭൂരിഭാഗം വിദ്യാർത്ഥികളും വൈദഗ്ധ്യമുള്ള തൊഴിലാളികളും ഇന്ത്യയെ മുൻനിര രാജ്യമാക്കി നിലനിർത്തുന്നു.
സ്റ്റഡി പെർമിറ്റുകൾ: ജനുവരി മുതൽ മാർച്ച് വരെ 96,015 സ്റ്റഡി പെർമിറ്റുകൾക്ക് കാനഡ അംഗീകാരം നൽകി.
വർക്ക് പെർമിറ്റുകൾ: താൽക്കാലിക വിദേശ തൊഴിലാളി പ്രോഗ്രാം (TFWP), ഇന്റർനാഷണൽ മൊബിലിറ്റി പ്രോഗ്രാം (IMP) പോലുള്ള പ്രോഗ്രാമുകൾ വഴി 186,805 വർക്ക് പെർമിറ്റുകൾക്ക് ഐആർസിസി അംഗീകാരം നൽകി.
സന്ദർശക വീസകൾ: ഒരു വിനോദസഞ്ചാര കേന്ദ്രമെന്ന നിലയിൽ കാനഡയിലേക്ക് ആകർഷിക്കപ്പെടുന്ന വിദേശ പൗരന്മാരുടെ എണ്ണം ഉയർന്നതായി റിപ്പോർട്ടുകൾ സൂചിപ്പിക്കുന്നു. 273,990 സന്ദർശക വീസകൾക്കാണ് കാനഡ അനുമതി നൽകിയത്.
