സ്പൈനൽ മസ്കുലർ അട്രോഫി ബാധിതർക്ക് ഇന്ത്യൻ നിർമ്മിത ജനറിക് മരുന്ന് നൽകുന്നതിനെ പിന്തുണച്ച് ആരോഗ്യ വിദഗ്ധർ രംഗത്തെത്തി. ഉയർന്ന ഗുണനിലവാരമുള്ള ജനറിക് മരുന്നാണ് ഇപ്പോൾ നൽകുന്നതെന്ന് ആസൂത്രണ ബോർഡ് മുൻ അംഗം ഡോ. ബി. ഇഖ്ബാൽ വ്യക്തമാക്കിയതായും, മറ്റ് പല വിദഗ്ധ ഡോക്ടർമാർക്കും ഇതേ അഭിപ്രായമാണുള്ളതെന്നും റിപ്പോർട്ടുകൾ വ്യക്തമാക്കുന്നു.

മരുന്നിന്റെ ഗുണമേന്മ പൂർണ്ണമായി ഉറപ്പുവരുത്തിയ ശേഷമാണ് കരാർ ഒപ്പിട്ടതെന്നും അതിനാൽ കരാറിൽ നിന്ന് പിന്നോട്ടില്ലെന്നും മന്ത്രി കെ. മുരളീധരൻ വ്യക്തമാക്കി. മുൻ സർക്കാരിന്റെ കാലത്തും ഇതേ മരുന്ന് വാങ്ങാൻ നടപടികൾ ആരംഭിച്ചിരുന്നുവെന്നും, കുട്ടികളിൽ മരുന്ന് പരീക്ഷണം നടത്തരുതെന്ന മുൻമന്ത്രി കെ.കെ. ശൈലജയുടെ പ്രസ്താവനയോട് പ്രതികരിക്കവെ അദ്ദേഹം ചൂണ്ടിക്കാണിച്ചു.

രോഗികൾക്ക് ജനറിക് മരുന്ന് നൽകുന്നതിലെ ആശങ്ക വ്യക്തമാക്കി പ്രതിപക്ഷ നേതാവ് പിണറായി വിജയൻ മന്ത്രി മുരളീധരന് കത്ത് നൽകിയതാണ് ഈ വിവാദങ്ങൾക്ക് തുടക്കമിട്ടത്. കത്തിന് നേരിട്ട് മറുപടി നൽകിയില്ലെങ്കിലും രേഖകൾ വീണ്ടും പരിശോധിക്കാൻ മന്ത്രി നിർദ്ദേശം നൽകിയിരുന്നു. ഈ പരിശോധനയിലാണ് മുൻ സർക്കാരിന്റെ കാലത്തും സമാനമായ രീതിയിൽ ഈ മരുന്ന് വാങ്ങാൻ നീക്കം നടന്നിരുന്നതിന്റെ ഫയലുകൾ ലഭ്യമായത്.

സ്വിസ് കമ്പനിയായ റോഷിന്റെ മരുന്നാണ് സംസ്ഥാനം വാങ്ങിയിരുന്നത്. ഒരു കുപ്പിയുടെ വില 5.20 ലക്ഷം രൂപ. ഇതേമരുന്നിന്റെ ജനറിക് പതിപ്പായ റിസിഡിപ്ലാം നാറ്റ്കോ 15,900 രൂപയ്ക്കാണ് വിൽക്കുന്നത്. ഈ കമ്പനിയുമായുള്ള ചർച്ചയ്ക്കൊടുവിൽ 8000 രൂപയ്ക്ക് കരാർ ഉറപ്പിച്ചു. ഇന്ത്യൻ മരുന്നുനിയന്ത്രണ അത്തോറിറ്റിയായ ഡ്രഗ്സ് കൺട്രോളർ ജനറൽ ഓഫ് ഇന്ത്യയുടെ അംഗീകാരത്തോടെയാണ് ഈ മരുന്ന് വിപണിയിൽ എത്തിയത്. ഇതേമരുന്ന് വിവിധ രാജ്യങ്ങളിൽ ഉപയോഗിക്കുന്നുമുണ്ട്.

സാംപിൾ മരുന്ന് തിരികെവാങ്ങി എസ്.എടി ആശുപത്രി

തിരുവനന്തപുരം • സ്പൈനൽ മസ്കുലർ അട്രോഫി ബാധിതർക്ക് നൽകിയ റിസിഡിപ്ലാം മരുന്നിന്റെ സാംപിൾ എസ്.എടി ആശുപത്രി അധികൃതർ തിരികെവാങ്ങി. പിന്നീട് കരാർ പ്രകാരമുള്ള മരുന്ന് നൽകി.

നാറ്റ്‌കോ കമ്പനിയുമായാണ് മെഡിക്കൽ സർവീസ് കോർപറേഷൻ കരാറിൽ ഏർപ്പെട്ടത്. വെള്ളിയാഴ്ച എസ്.എടിയിൽ എത്തുന്ന രോഗികൾക്കു നൽകാൻ മരുന്നുണ്ടായിരുന്നില്ല. നാറ്റ്‌കോ കമ്പനി അധികൃതരെ ബന്ധപ്പെട്ടപ്പോൾ സാംപിൾ മരുന്ന് എത്തിക്കാമെന്നും കരാർ അനുസരിച്ചുള്ള മരുന്ന് തിങ്കളാഴ്ച എത്തിക്കാമെന്നുമായിരുന്നു മറുപടി. ഇങ്ങനെ എത്തിച്ച മരുന്നിന്റെ കവറിൽ ‘ഫിസിഷ്യൻസ് സാംപിൾ അഥവാ ക്ലിനിക്കൽ ട്രയൽ’ എന്നു രേഖപ്പെടുത്തിയിരുന്നു. ഇത് 6 രോഗികൾക്കാണു നൽകിയത്. പുറത്തെ കുറിപ്പു കണ്ടപ്പോൾ രോഗികളുടെ ബന്ധുക്കൾ ആശങ്ക അറിയിച്ചു. മരുന്നുകൾ തിരികെവാങ്ങി. കരാർ പ്രകാരമുള്ള മരുന്ന് തിങ്കളാഴ്ച എത്തി. ഇപ്പോൾ ആ മരുന്നാണു വിതരണം ചെയ്യുന്നതെന്ന് എസ്.എടി ആശുപത്രി സൂപ്രണ്ട് ഡോ.എൻ.റിയാസ് അറിയിച്ചു.