ഈസ്റ്റർ ആഘോഷത്തിനിടെ കാലിഫോർണിയയിലെ പാർക്കിൽ മനുഷ്യന്റെ അസ്ഥികൂടങ്ങൾ കണ്ടെത്തിയതായി റിപ്പോർട്ട്. ലോങ് ബീച്ച് നഗരത്തിലെ തണ്ണീർത്തടത്തിന് സമീപമുള്ള ഡിഫോറസ്റ്റ് പാർക്കിനടുത്താണ് സംഭവം. ഞായറാഴ്ച ഉച്ചതിരിഞ്ഞ് ഈസ്റ്റർ എഗ്ഗ് ഹണ്ടിങ്ങിനിടെ ഒരു കുടുംബമാണ് അസ്ഥികൂടത്തിന്റെ ഭാഗങ്ങൾ കണ്ടത്. ഉടൻ തന്നെ വിവരമറിയിച്ചതിനെത്തുടർന്ന് ലോങ് ബീച്ച് പൊലീസ് സ്ഥലത്തെത്തി അന്വേഷണം ആരംഭിച്ചു.
ഒരു ചെറിയ കുട്ടിയുടേതെന്ന് തോന്നിക്കുന്ന തലയോട്ടിയും മറ്റ് അസ്ഥികളുമാണ് കണ്ടെത്തിയത്. വിനോദത്തിനിടയിൽ അപ്രതീക്ഷിതമായി കണ്ട കാഴ്ച കുട്ടികളിലും മുതിർന്നവരിലും വലിയ ഭീതി പടർത്തിയിട്ടുണ്ട്. സ്ഥലത്തുനിന്നുള്ള ദൃശ്യങ്ങളിൽ, പാതയോരത്ത് ചിതറിക്കിടക്കുന്ന നിറമുള്ള ഈസ്റ്റർ മുട്ടകൾക്ക് സമീപം മണ്ണിൽ ഭാഗികമായി കുഴിച്ചിട്ട നിലയിലുള്ള തലയോട്ടി കാണാമായിരുന്നു. പൊലീസ് ഉടൻ തന്നെ പ്രദേശം നിരീക്ഷണത്തിലാക്കുകയും സുരക്ഷാ ക്രമീകരണങ്ങൾ ഏർപ്പെടുത്തുകയും ചെയ്തു.
ലോസ് ഏഞ്ചൽസ് കൗണ്ടി മെഡിക്കൽ എക്സാമിനർ ഓഫീസ് സംഭവസ്ഥലത്തെത്തി പരിശോധനകൾ നടത്തിവരികയാണ്. ഈ അവശിഷ്ടങ്ങൾ ആരുടേതാണെന്നോ എത്ര കാലം പഴക്കമുണ്ടെന്നോ ഉള്ള കാര്യത്തിൽ ഇതുവരെ ഔദ്യോഗിക സ്ഥിരീകരണം വന്നിട്ടില്ല. അന്വേഷണം പ്രാഥമിക ഘട്ടത്തിലായതിനാൽ കൂടുതൽ വിവരങ്ങൾ പുറത്തുവിടാൻ പൊലീസ് തയ്യാറായിട്ടില്ല. ഈസ്റ്റർ ആഘോഷത്തിന്റെ സന്തോഷം ഈ ദാരുണമായ കണ്ടെത്തലോടെ വലിയൊരു ദുരന്തവാർത്തയായി മാറിയിരിക്കുകയാണ്.
