ഫെഡറൽ സർക്കാർ വിസ നിയമങ്ങളിൽ വരുത്തിയ കർശന നിയന്ത്രണങ്ങളെത്തുടർന്ന് ഒൻ്റാരിയോയിലെ കോളജുകളിൽ പഠിക്കാൻ എത്തുന്ന വിദേശ വിദ്യാർത്ഥികളുടെ എണ്ണത്തിൽ വൻ ഇടിവ് നേരിടുന്നതായി റിപ്പോർട്ട്. ഫെഡറൽ സർക്കാർ സ്റ്റഡി പെർമിറ്റുകൾക്ക് നിയന്ത്രണം ഏർപ്പെടുത്തിയതോടെ ഒൻ്റാരിയോയിലെ കോളജുകളിൽ വിദേശ വിദ്യാർത്ഥികളുടെ പ്രവേശനം പകുതിയോളം കുറയുകയും ഇത് കടുത്ത സാമ്പത്തിക പ്രതിസന്ധിയിലേക്ക് നയിക്കുകയും ചെയ്തിട്ടുണ്ട്.
വിദ്യാർത്ഥികൾക്ക് പ്രവിശ്യാ സർക്കാർ നൽകേണ്ട ‘പ്രൊവിൻഷ്യൽ അറ്റസ്റ്റേഷൻ ലെറ്ററുകൾ’ (PAL) അനുവദിച്ചതിൽ വെറും 46% മാത്രമാണ് ഒൻ്റാരിയോയിലെ കോളജുകൾക്ക് ഉപയോഗിക്കാൻ കഴിഞ്ഞിട്ടുള്ളത്. മുൻകാലങ്ങളെ അപേക്ഷിച്ച് സ്റ്റഡി വിസ ലഭിക്കാനുള്ള നിരക്ക് പ്രവിശ്യയിൽ 46 മുതൽ 68 ശതമാനം വരെയായി കുറഞ്ഞതാണ് ഇതിന് പ്രധാന കാരണം. സർവകലാശാലകളെ അപേക്ഷിച്ച് ജോലി ഉറപ്പുനൽകുന്ന കോഴ്സുകൾ നടത്തുന്ന കോളജുകളെയാണ് ഈ പ്രതിസന്ധി കൂടുതൽ ബാധിച്ചത്. ഒൻ്റാരിയോയിലെ പ്രമുഖ വിദ്യാഭ്യാസ സ്ഥാപനങ്ങളായ കോനെസ്റ്റോഗ കോളജ്, സെനേക്ക പോളിടെക്നിക് തുടങ്ങിയവയ്ക്ക് അനുവദിച്ച സീറ്റുകളുടെ പകുതി പോലും നിലവിൽ നികത്താൻ സാധിച്ചിട്ടില്ല.
പഠനത്തിന് ശേഷമുള്ള വർക്ക് പെർമിറ്റുകളിൽ (Post-Graduate Work Permit) ഫെഡറൽ സർക്കാർ വരുത്തിയ വെട്ടിക്കുറയ്ക്കലുകളാണ് വിദ്യാർത്ഥികളെ കാനഡയിൽ നിന്നും അകറ്റുന്നതെന്ന് വിദഗ്ധർ ചൂണ്ടിക്കാണിക്കുന്നു. അന്തർദേശീയ വിദ്യാർത്ഥികളിൽ നിന്നുള്ള ട്യൂഷൻ ഫീസിനെ ആശ്രയിച്ച് പ്രവർത്തിച്ചിരുന്ന പല കോളജുകളും ഇതോടെ പല ക്യാമ്പസുകളും അടച്ചുപൂട്ടാനും ജീവനക്കാരെ പിരിച്ചുവിടാനും നിർബന്ധിതരായി. ഈ സാഹചര്യം മറികടക്കാൻ ഒൻ്റാരിയോ പ്രവിശ്യാ സർക്കാർ കോളജുകൾക്ക് ട്യൂഷൻ ഫീസ് വർദ്ധിപ്പിക്കാൻ അനുമതി നൽകുകയും, ഉന്നതവിദ്യാഭ്യാസ മേഖലയെ സാമ്പത്തികമായി നിലനിർത്താൻ 6.4 ബില്യൺ ഡോളറിന്റെ പ്രത്യേക അധിക പാക്കേജ് പ്രഖ്യാപിക്കുകയും ചെയ്തിട്ടുണ്ട്.
