ടൊറൻ്റോ ഡൗൺടൗണിനെ പൂർണ്ണമായും നിശ്ചലമാക്കി വൻ വൈദ്യുതി തടസ്സം. ചൊവ്വാഴ്ച ഉച്ചയോടെയാണ് നഗരത്തിലെ പ്രധാന വാണിജ്യ-വിദ്യാഭ്യാസ കേന്ദ്രങ്ങളെ ബാധിച്ച പവർ ഔട്ടേജ് ഉണ്ടായത്. ഡൗൺടൗണിലെ പ്രധാന മേഖലകളിലെല്ലാം വൈദ്യുതി നിലച്ചതോടെ ജനജീവിതം ദുഷ്കരമായി. ടൊറൻ്റോ ഹൈഡ്രോയും ഹൈഡ്രോ വണ്ണും സംയുക്തമായി പ്രവർത്തിച്ചാണ് വൈദ്യുതി ബന്ധം പുനഃസ്ഥാപിച്ചത്. യൂണിവേഴ്സിറ്റി അവന്യൂവിനും യോങ് സ്ട്രീറ്റിനും ഇടയിൽ ഡണ്ടസ് സ്ട്രീറ്റിന് തെക്കോട്ടുള്ള വലിയൊരു മേഖലയാണ് പ്രശ്നബാധിതമേഖല. കൃത്യമായി എത്ര ഉപഭോക്താക്കളെ തടസ്സം ബാധിച്ചുവെന്ന് അധികൃതർ വ്യക്തമാക്കിയിട്ടില്ലെങ്കിലും നൂറുകണക്കിന് വ്യാപാര സ്ഥാപനങ്ങളും വീടുകളും ഇരുട്ടിലായതായാണ് റിപ്പോർട്ട്.
നഗരത്തിലെ പ്രശസ്തമായ ഈറ്റൺ സെന്ററിന് മുന്നിലെ കൂറ്റൻ ഇലക്ട്രോണിക് പരസ്യബോർഡുകളെല്ലാം ചൊവ്വാഴ്ച ഉച്ചയ്ക്ക് പന്ത്രണ്ട് മണിയോടെ പൂർണ്ണമായും അണഞ്ഞു. ഡൗൺടൗണിലെ ഭൂരിഭാഗം ട്രാഫിക് സിഗ്നലുകളും പ്രവർത്തിക്കാതായതോടെ വാഹനഗതാഗതം പൂർണ്ണമായും താറുമാറായി. സിഗ്നലുകൾ തകരാറിലായ കവലകളിൽ സുരക്ഷാ മാനദണ്ഡങ്ങൾ (Four-way stops) പാലിച്ച് വാഹനങ്ങൾ അതീവ ജാഗ്രതയോടെ ഓടിക്കണമെന്ന് ടൊറൻ്റോ പോലീസ് നിർദ്ദേശം നൽകിയിരുന്നു.
വൈദ്യുതി മുടങ്ങിയതിനെത്തുടർന്ന് ടൊറൻ്റോ മെട്രോപൊളിറ്റൻ യൂണിവേഴ്സിറ്റിയുടെ (TMU) ഡൗൺടൗൺ കാമ്പസിൽ നിന്ന് വിദ്യാർത്ഥികളെയും ജീവനക്കാരെയും അടിയന്തിരമായി ഒഴിപ്പിച്ചു. യൂണിവേഴ്സിറ്റിയുടെ ആർ.എ.സി (RAC), ജെ.ഒ.ആർ (JOR), പി.ഓ.ഡി (POD), ലൈബ്രറി (LIB), ടി.ആർ.എസ് (TRS), എസ്.എൽ.സി (SLC) ഉൾപ്പെടെയുള്ള എട്ടോളം പ്രധാന ബ്ലോക്കുകളിൽ ഉള്ളവരെയാണ് ഒഴിപ്പിച്ചതെന്ന് അധികൃതർ അറിയിച്ചു.
