ഫിലാഡല്‍ഫിയ : വാഷിംഗ്ടൺ വിമാനാപകടത്തിന് പിന്നാലെ അമേരിക്കയെ നടുക്കി മറ്റൊരു അപകടം കൂടി. ഫിലാഡല്‍ഫിയയിലെ ജനവാസ കേന്ദ്രത്തില്‍ ചെറുവിമാനം തകർന്നു വീണതായി റിപ്പോർട്ട്. വെള്ളിയാഴ്ച്ച വൈകിട്ട് 6.30 ഓടെ നോർത്ത് ഈസ്റ്റ് ഫിലാഡൽഫിയ എയർപോർട്ടിന് സമീപമാണ് അപകടം. ഒരു കുട്ടി അടക്കം ആറ് പേരുമായി പറന്നുയർന്ന മെഡിക്കൽ ട്രാൻസ്പോർട്ട് ജെറ്റ് ജനസാന്ദ്രതയേറിയ റോൺഹർസ്റ്റിലെ ഔട്ട്‌ഡോർ ഷോപ്പിംഗ് സെൻ്ററായ റൂസ്‌വെൽറ്റ് മാളിന് സമീപമുള്ള തിരക്കേറിയ ജംഗ്ഷനിലാണ് തകർന്നത് വീണത്. നാല് ജീവനക്കാരോടൊപ്പം രോഗിയും മറ്റൊരു യാത്രക്കാരനും വിമാനത്തിലുണ്ടായിരുന്നതായി ജെറ്റ് റെസ്‌ക്യൂ എയർ ആംബുലൻസ് അറിയിച്ചു.

അപകടത്തിന് പിന്നാലെ പ്രദേശത്ത് തീപടര്‍ന്നതിനെ തുടര്‍ന്ന് ജനവാസ മേഖലയിലെ നിരവധി വീടുകൾക്കും കെട്ടിടങ്ങൾക്കും കേടുപാടുകള്‍ സംഭവിച്ചതായി അധികൃതർ അറിയിച്ചു. അതേസമയം വാഷിംഗ്ടണ്‍ Reagan National Airport-ന്റെ സമീപത്ത് ബുധനാഴ്ചയുണ്ടായ വിമാനാപകടത്തിൽ 67 പേര്‍ മരിച്ചിരുന്നു, കഴിഞ്ഞ ഇരുപത്തി നാലു വര്‍ഷത്തിനിടയില്‍ യുഎസില്‍ നടന്ന ഏറ്റവും വലിയ വിമാനാപകടമായിരുന്നു കഴിഞ്ഞദിവസം ഉണ്ടായത്.