കൊച്ചി: രാജ്യത്ത് ജനങ്ങള്‍ക്ക് കനത്ത പ്രഹരമേകി ഇന്ധനവിലയില്‍ വീണ്ടും വര്‍ധനവ് രേഖപ്പെടുത്തി. അഞ്ച് ദിവസത്തിനിടെ ഇത് നാലാം തവണയാണ് പെട്രോള്‍, ഡീസല്‍ നിരക്കുകള്‍ ഉയര്‍ത്തുന്നത്. പുതിയ വര്‍ധനവ് പ്രകാരം പെട്രോള്‍ ലിറ്ററിന് 95 പൈസയും ഡീസലിന് 96 പൈസയുമാണ് കൂട്ടിയത്. ഇതോടെ കഴിഞ്ഞ ഒരാഴ്ചയ്ക്കുള്ളില്‍ മാത്രം പെട്രോളിനും ഡീസലിനും മൊത്തത്തില്‍ നാല് രൂപയിലേറെയാണ് വര്‍ധിച്ചത്. സാധാരണ ഇന്ധനങ്ങള്‍ക്ക് പുറമെ പ്രീമിയം വിഭാഗത്തില്‍പ്പെടുന്ന പെട്രോള്‍, ഡീസല്‍ നിരക്കുകളിലും സമാനമായ രീതിയില്‍ വില കൂട്ടിയിട്ടുണ്ട്.

പുതിയ നിരക്കുകള്‍ നിലവില്‍ വന്നതോടെ കൊച്ചിയില്‍ ഒരു ലിറ്റര്‍ പെട്രോളിന്റെ വില 109.85 രൂപയായി ഉയര്‍ന്നു. ഡീസല്‍ വില ലിറ്ററിന് 98.73 രൂപയിലുമെത്തി. തലസ്ഥാന നഗരമായ തിരുവനന്തപുരത്ത് ഇന്ധനവില ഇതിലും ഉയര്‍ന്ന നിരക്കിലാണ്; ഇവിടെ ഒരു ലിറ്റര്‍ പെട്രോള്‍ ലഭിക്കാന്‍ 111.71 രൂപ നല്‍കണം. പശ്ചിമേഷ്യയില്‍ ഇറാനും ഇസ്രയേലും തമ്മില്‍ നിലനില്‍ക്കുന്ന കടുത്ത യുദ്ധസാഹചര്യത്തെ തുടര്‍ന്ന് അന്താരാഷ്ട്ര വിപണിയില്‍ ക്രൂഡ് ഓയില്‍ വില കുതിച്ചുയരുന്നതാണ് രാജ്യത്ത് ഇന്ധനവില നിയന്ത്രണാതീതമായി ഉയരാന്‍ കാരണം.

അന്താരാഷ്ട്ര വിപണിയിലെ അസ്ഥിരത തുടരുന്ന സാഹചര്യത്തില്‍ പൊതുമേഖലാ എണ്ണക്കമ്പനികള്‍ക്ക് മുന്‍പുണ്ടായ വന്‍ സാമ്പത്തിക നഷ്ടം നികത്താന്‍ വരും ദിവസങ്ങളിലും ഇന്ധനവില ക്രമേണ വര്‍ധിപ്പിക്കുമെന്നാണ് എണ്ണ മന്ത്രാലയ വൃത്തങ്ങളില്‍ നിന്നുള്ള സൂചന. തുടര്‍ച്ചയായുണ്ടാകുന്ന ഈ വിലക്കയറ്റം ചരക്കുകൂലി വര്‍ധിക്കുന്നതിനും അതുവഴി സംസ്ഥാനത്ത് നിത്യോപയോഗ സാധനങ്ങളുടെ വില കുതിച്ചുയരുന്നതിനും കാരണമാകുമെന്ന ആശങ്കയിലാണ് പൊതുജനങ്ങള്‍.