പൃഥ്വിരാജ്, വൈശാഖ്, ജിനു എബ്രഹാം കൂട്ടുകെട്ടിലൊരുങ്ങുന്ന ബിഗ് ബഡ്ജറ്റ് ആക്ഷൻ ത്രില്ലർ ‘ഖലീഫ’യിലെ തന്റെ ഭാഗങ്ങളുടെ ഡബ്ബിങ് പ്രിയതാരം മോഹൻലാൽ പൂർത്തിയാക്കി. അണിയറപ്രവർത്തകർ മോഹൻലാലിനൊപ്പമുള്ള ചിത്രങ്ങൾ പങ്കുവെച്ചുകൊണ്ടാണ് ഈ വാർത്ത പുറത്തുവിട്ടത്. ചിത്രത്തിൽ ‘മാമ്പറയ്ക്കൽ അഹമ്മദ് അലി’ എന്ന അതിഥി കഥാപാത്രമായാണ് മോഹൻലാൽ എത്തുന്നതെങ്കിലും, ഈ കഥാപാത്രത്തെ കേന്ദ്രീകരിച്ചുള്ള ചിത്രത്തിന്റെ രണ്ടാം ഭാഗത്തിൽ അദ്ദേഹം നായകനായി എത്തും. മോഹൻലാലിന്റെ ഈ കഥാപാത്രം നൽകുന്ന വിസ്മയ നിമിഷങ്ങൾക്ക് സാക്ഷ്യം വഹിച്ച ശേഷം രണ്ടാം ഭാഗത്തിനായി കാത്തിരിക്കുകയാണെന്നും, ഇതൊരു വലിയ യാത്രയുടെ തുടക്കം മാത്രമാണെന്നും സംവിധായകൻ വൈശാഖ് സോഷ്യൽ മീഡിയയിൽ കുറിച്ചു.
‘പ്രതികാരം സുവർണ്ണ ലിപികളാൽ എഴുതപ്പെടും’ എന്ന ടാഗ്‌ലൈനോടെ എത്തുന്ന ചിത്രത്തിൽ മാമ്പറയ്ക്കൽ അഹമ്മദ് അലിയുടെ കൊച്ചുമകനായ ‘മാമ്പറയ്ക്കൽ ആമിർ അലി’ എന്ന നായക കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. ബോളിവുഡ് താരം നീൽ നിതിൻ മുകേഷ് ആദ്യമായി മലയാളത്തിൽ അഭിനയിക്കുന്ന ചിത്രം കൂടിയാണിത്. തെലുങ്ക് താരം മാളവിക ശർമ്മ നായികയായി എത്തുന്ന ഈ ചിത്രത്തിലെ പൃഥ്വിരാജ്-മാളവിക ജോഡികളുടെ പ്രണയരംഗങ്ങൾ ഉൾപ്പെടുത്തിയ ‘അസലായവളെ’ എന്ന ഗാനം ഇതിനോടകം വൻ ഹിറ്റായി മാറിയിട്ടുണ്ട്.
സ്വർണ്ണ കള്ളക്കടത്തിന്റെ പശ്ചാത്തലത്തിൽ വൻ കാൻവാസിൽ ഒരുക്കുന്ന ‘ഖലീഫ’യിൽ ത്രസിപ്പിക്കുന്ന ചേസ് രംഗങ്ങളും മാസ് ആക്ഷൻ സന്ദർഭങ്ങളും നിറഞ്ഞിരിക്കുന്നു. ‘പോക്കിരി രാജ’യ്ക്ക് ശേഷം വൈശാഖും പൃഥ്വിരാജും വീണ്ടും ഒന്നിക്കുന്ന ചിത്രം ലണ്ടൻ, ദുബായ്, നേപ്പാൾ, കേരളം എന്നിവിടങ്ങളിലെ വിവിധ ലൊക്കേഷനുകളിലാണ് ചിത്രീകരിച്ചത്. ആദം ജോൺ, ലണ്ടൻ ബ്രിഡ്ജ്, മാസ്റ്റേഴ്സ്, കടുവ എന്നീ സിനിമകൾക്കു ശേഷം ജിനു എബ്രഹാം – പൃഥ്വിരാജ് കൂട്ടുകെട്ട് വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്.
ജിനു ഇന്നോവേഷന്റെ ബാനറിൽ ജിനു എബ്രഹാമും സൂരജ് കുമാറും ചേർന്ന് നിർമ്മിക്കുന്ന ചിത്രത്തിന് സിജോ സെബാസ്റ്റ്യൻ, ശ്രീലാൽ ശൂലപാണി എന്നിവരാണ് സഹനിർമ്മാതാക്കൾ. ജോമോൻ ടി. ജോൺ ഛായാഗ്രഹണവും ജാക്സ് ബിജോയ് സംഗീതസംവിധാനവും നിർവ്വഹിക്കുന്നു. ചമൻ ചാക്കോ എഡിറ്റിംഗ് കൈകാര്യം ചെയ്യുമ്പോൾ യാനിക്ക് ബെൻ, ഫീനിക്സ് പ്രഭു, ചേതൻ ഡിസൂസ എന്നിവരാണ് ആക്ഷൻ രംഗങ്ങൾ ഒരുക്കുന്നത്. ഈ വർഷത്തെ ഓണം റിലീസായി ഓഗസ്റ്റ് 20-നാണ് ‘ഖലീഫ’ ആഗോളതലത്തിൽ തിയേറ്ററുകളിലെത്തുന്നത്.
