ഒൻ്റാരിയോ പ്രീമിയർ ഡഗ് ഫോർഡിന്റെ കാബിനറ്റിൽ നിന്നും പ്രവിശ്യാ നിയമസഭയിൽ നിന്നും പ്രമുഖ നേതാവ് കരോലിൻ മൽറോണി രാജിവെക്കുന്നതായി റിപ്പോർട്ട്. ജൂൺ 5-ഓടെ രാജി പ്രാബല്യത്തിൽ വരുമെന്ന് അവർ സോഷ്യൽ മീഡിയയിലൂടെ അറിയിച്ചു. കഴിഞ്ഞ എട്ട് വർഷമായി ജനപ്രതിനിധിയായും മന്ത്രിയായും സേവനമനുഷ്ഠിക്കാൻ കഴിഞ്ഞത് വലിയ ഭാഗ്യമായി കരുതുന്നുവെന്നും കടുത്ത ആലോചനകൾക്കൊടുവിലാണ് ഈ തീരുമാനമെന്നും അവർ വ്യക്തമാക്കി.
മുൻ കനേഡിയൻ പ്രധാനമന്ത്രി ബ്രയാൻ മൽറോണിയുടെ മകളായ കരോലിൻ, പിതാവിന്റെ വിയോഗത്തിന് ശേഷമുള്ള വ്യക്തിപരമായ മാറ്റങ്ങളാണ് രാഷ്ട്രീയത്തിൽ നിന്ന് മാറിനിൽക്കാൻ പ്രേരിപ്പിച്ചതെന്ന് സൂചിപ്പിച്ചു. കുട്ടികളെല്ലാം പഠനാവശ്യങ്ങൾക്കായി മാറിത്താമസിച്ച സാഹചര്യത്തിൽ, ജീവിതത്തിൽ പുതിയൊരു അധ്യായം തുടങ്ങാൻ ഇതാണ് ശരിയായ സമയമെന്ന് അവർ പറഞ്ഞു. തനിക്ക് നൽകിയ പിന്തുണയ്ക്ക് പ്രീമിയർ ഡഗ് ഫോർഡിനോട് അവർ നന്ദി പറഞ്ഞു.
2018-ൽ തിരഞ്ഞെടുക്കപ്പെട്ട കരോലിൻ മൽറോണി അറ്റോർണി ജനറൽ, ഗതാഗത മന്ത്രി, ട്രഷറി ബോർഡ് പ്രസിഡന്റ് തുടങ്ങിയ നിരവധി സുപ്രധാന പദവികൾ വഹിച്ചിട്ടുണ്ട്. കരോലിൻ തന്റെ അടുത്ത സുഹൃത്താണെന്നും അവരുടെ മികച്ച നേതൃത്വം പ്രവിശ്യയ്ക്ക് വലിയ സംഭാവനയാണ് നൽകിയതെന്നും പ്രീമിയർ ഡഗ് ഫോർഡ് പ്രതികരിച്ചു. കരോലിൻ രാജിവെക്കുന്നതോടെ ധനമന്ത്രി പീറ്റർ ബെത്ലൻഫാവ്ലിക്ക് ട്രഷറി ബോർഡിന്റെ താൽക്കാലിക ചുമതല നൽകും.
