ന്യൂയോർക്ക് സിറ്റിയിൽ ഈ വേനൽക്കാലത്ത് വെസ്റ്റ് നൈൽ വൈറസ് (West Nile virus) സ്ഥിരീകരിച്ച കൊതുകുകളുടെ സാന്നിധ്യം കഴിഞ്ഞ വർഷത്തേക്കാൾ ഇരട്ടിയായതായി റിപ്പോർട്ട്. എന്നാൽ ഈ സീസണിൽ നഗരവാസികളിൽ ആർക്കും രോഗബാധ റിപ്പോർട്ട് ചെയ്തിട്ടില്ലെന്ന് ആരോഗ്യ വകുപ്പ് ഉദ്യോഗസ്ഥർ വ്യക്തമാക്കി.
അഞ്ച് ബോറോകളിലുമായി ശേഖരിച്ച 2,000-ത്തിലധികം സാമ്പിളുകളിൽ 612 എണ്ണത്തിൽ വൈറസ് സാന്നിധ്യം കണ്ടെത്തി. കഴിഞ്ഞ വർഷം ഇതേ സമയത്തുണ്ടായതിനേക്കാൾ ഇരട്ടിയോളമാണിത്. കൂടുതൽ ബാധിക്കപ്പെട്ട പ്രദേശങ്ങൾ: സ്പാറ്റൻ ഐലൻഡ് (Staten Island), ക്വീൻസ് (Queens) എന്നിവിടങ്ങളിലാണ് വൈറസ് ബാധിച്ച കൊതുകുകൾ കൂടുതൽ കാണപ്പെടുന്നത്. പ്രതിരോധ നടപടികൾ: രോഗബാധിത പ്രദേശങ്ങളിൽ കൂടുതൽ കെണികൾ സ്ഥാപിച്ചും പ്രതിരോധ പ്രവർത്തനങ്ങൾ വ്യാപിപ്പിച്ചും നിരീക്ഷണം ശക്തമാക്കി. ജൂലൈ മുതൽ നടത്തിയ നാല് പ്രത്യേക ഡ്രൈവുകളിലൂടെ കൊതുകുകളുടെ എണ്ണത്തിൽ 70% കുറവു വരുത്താൻ നഗരസഭയ്ക്ക് സാധിച്ചു.
വെസ്റ്റ് നൈൽ വൈറസ്: അറിയേണ്ട കാര്യങ്ങൾ
ന്യൂയോർക്ക് സിറ്റിയിൽ കൊതുകുകൾ വഴി മനുഷ്യരിലേക്ക് പടരുന്ന ഏക രോഗമാണ് വെസ്റ്റ് നൈൽ വൈറസ്. കഴിഞ്ഞ 25 വർഷത്തിലേറെയായി നഗരത്തിൽ ഈ രോഗസാന്നിധ്യമുണ്ട്. രോഗബാധിതരിൽ ഭൂരിഭാഗം പേർക്കും ലക്ഷണങ്ങൾ ഉണ്ടാകാറില്ല. എന്നാൽ അഞ്ചിൽ ഒരാൾക്ക് പനി, തലവേദന, ശരീരവേദന, ഛർദ്ദി തുടങ്ങിയ ലക്ഷണങ്ങൾ കാണപ്പെടാം. അപൂർവ്വം ചിലരിൽ തലച്ചോറിനെ ബാധിക്കുന്ന എൻസെഫലൈറ്റിസ് (Encephalitis), മെനിഞ്ചൈറ്റിസ് (Meningitis) തുടങ്ങിയ ഗുരുതരമായ ആരോഗ്യപ്രശ്നങ്ങൾക്ക് ഇത് കാരണമാകാം.
ജാഗ്രതാ നിർദ്ദേശങ്ങൾ
ഓഗസ്റ്റ്, സെപ്റ്റംബർ മാസങ്ങളിലാണ് ഈ കൊതുകുകൾ കൂടുതൽ സജീവമാകുന്നത്. അതിനാൽ പ്രായമായവരും പ്രതിരോധശേഷി കുറഞ്ഞവരും പ്രത്യേക മുൻകരുതലുകൾ എടുക്കണമെന്ന് ന്യൂയോർക്ക് സിറ്റി ഹെൽത്ത് കമ്മീഷണർ ഡോ. അലിസ്റ്റർ എഫ്. മാർട്ടിൻ നിർദ്ദേശിച്ചു. കൊതുകുകൾ കൂടുതൽ സജീവമാകുന്ന പ്രഭാത, സന്ധ്യാ സമയങ്ങളിൽ പുറത്തിറങ്ങുന്നത് പരമാവധി കുറയ്ക്കുക. പൂർണ്ണമായി ശരീരം മൂടുന്ന വസ്ത്രങ്ങൾ ധരിക്കുക. അംഗീകൃത കൊതുക് നിവാരണ ക്രീമുകൾ/സ്പ്രേകൾ ഉപയോഗിക്കുക.
