ന്യൂയോർക്ക്: കായികരംഗത്തെ ഓസ്കാർ എന്നറിയപ്പെടുന്ന പ്രശസ്തമായ ESPY (Excellence in Sports Performance Yearly) പുരസ്കാരങ്ങളിൽ ചരിത്രനേട്ടവുമായി ന്യൂയോർക്ക് നിക്സും (New York Knicks) സൂപ്പർതാരം ജെയ്‌ലൻ ബ്രൺസണും (Jalen Brunson). ന്യൂയോർക്കിലെ ലിങ്കൺ സെന്ററിലുള്ള ഡേവിഡ് എച്ച്. കോച്ച് തിയേറ്ററിൽ നടന്ന ആവേശോജ്ജ്വലമായ അവാർഡ് നിശയിൽ പുരസ്കാരങ്ങൾ തൂത്തുവാരി നിക്സ് തങ്ങളുടെ സുവർണ്ണ വേനൽക്കാലം ആഘോഷമാക്കി. മത്സരരംഗത്തെ പ്രമുഖരെ അമ്പരിപ്പിച്ചുകൊണ്ട് ‘മികച്ച ടീമിനുള്ള’ (Best Team) പുരസ്കാരം ന്യൂയോർക്ക് നിക്സ് സ്വന്തമാക്കിയപ്പോൾ, കായികലോകത്തെ ഒന്നടങ്കം വിസ്മയിപ്പിച്ച പ്രകടനത്തിലൂടെ മൂന്ന് വ്യക്തിഗത അവാർഡുകളാണ് ജെയ്‌ലൻ ബ്രൺസൺ തന്റെ പേരിൽ കുറിച്ചത്.

അവാർഡുകൾ വാരിക്കൂട്ടി ബ്രൺസൺ

ടക്സീഡോ സ്യൂട്ടിൽ ഭാര്യ അലി മാർക്സ് ബ്രൺസനൊപ്പം അവാർഡ് വേദിയിലെത്തിയ നിക്സിന്റെ സൂപ്പർതാര ഗാർഡ് ജെയ്‌ലൻ ബ്രൺസൺ താഴെ പറയുന്ന മൂന്ന് പ്രധാന പുരസ്കാരങ്ങളാണ് അക്കൗണ്ടിലാക്കിയത്:

മികച്ച എൻ.ബി.എ താരം (Best NBA Player)

മികച്ച ചാമ്പ്യൻഷിപ്പ് പ്രകടനം (Best Championship Performance)

പുരുഷ കായിക ലോകത്തെ മികച്ച അത്‌ലറ്റ് (Best Athlete in Men’s Sports)

ഫുട്ബോൾ ഇതിഹാസം ലയണൽ മെസ്സി, ഡോഡ്ജേഴ്സിന്റെ താരം ഷോഹെയ് ഒട്ടാനി, റാംസ് ക്വാർട്ടർബാക്ക് മാത്യു സ്റ്റാഫോർഡ് എന്നിവരടങ്ങുന്ന വമ്പൻ നിരയെ മറികടന്നാണ് ബ്രൺസൺ കായിക ലോകത്തെ മികച്ച പുരുഷ അത്‌ലറ്റായി തിരഞ്ഞെടുക്കപ്പെട്ടത്. മികച്ച ചാമ്പ്യൻഷിപ്പ് പ്രകടനത്തിനുള്ള മത്സരത്തിൽ യു.എസ് ഹോക്കി സ്വർണ്ണ മെഡൽ ജേതാക്കളായ എറിൻ ഫ്രാങ്കൽ, കോണർ ഹെല്ലിബക്ക്, ടെക്സാസ് സോഫ്റ്റ്‌ബോളിന്റെ ടീഗൻ കവൻ എന്നിവരെയും താരം പിന്നിലാക്കി.

“എല്ലാറ്റിനും ഉപരിയായി, എനിക്കായി ഒട്ടനവധി ത്യാഗങ്ങൾ സഹിച്ച എന്റെ കുടുംബത്തിന് ഞാൻ നന്ദി പറയുന്നു. നിക്സ് ഉടമ ജിം ഡോളൻ, നിക്സ് ഓർഗനൈസേഷൻ, പ്രസിഡന്റ് ലിയോൺ റോസ്, ഫ്രണ്ട് ഓഫീസ്, മൈക്ക് ബ്രൗൺ, ഒപ്പം എന്റെ സഹതാരങ്ങൾ എന്നിവർക്കും നന്ദി. അവരില്ലായിരുന്നെങ്കിൽ ഇതൊന്നും സാധ്യമാകുമായിരുന്നില്ല. എനിക്ക് എന്റെ ശൈലിയിൽ കളിക്കാൻ അവർ പൂർണ്ണ സ്വാതന്ത്ര്യം നൽകി. അവരോട് ഞാൻ എക്കാലവും കടപ്പെട്ടിരിക്കുന്നു.” — അവാർഡ് സ്വീകരിച്ചുകൊണ്ട് ജെയ്‌ലൻ ബ്രൺസൺ പറഞ്ഞു.

നിക്സിന് ഇരട്ടി മധുരം; ‘മികച്ച പ്ലേ’ പുരസ്കാരവും സ്വന്തം. മറ്റ് എട്ട് പ്രമുഖ കായിക ടീമുകളെ പിന്തള്ളിയാണ് ന്യൂയോർക്ക് നിക്സ് മികച്ച ടീമായി മാറിയത്. ടീം പ്രെസിഡന്റ് ലിയോൺ റോസ്, താരങ്ങളായ ഒ.ജി അനുനോബി, കാൾ-ആന്തണി ടൗൺസ്, മിക്കാൽ ബ്രിഡ്ജസ് എന്നിവരടങ്ങുന്ന നിക്സ് സംഘം ബ്രൺസനൊപ്പം വേദിയിലെത്തിയാണ് പുരസ്കാരം ഏറ്റുവാങ്ങിയത്. ഇതിനുപുറമെ, എൻ.ബി.എ ഫൈനൽസിന്റെ നാലാം മത്സരത്തിൽ നിക്സിന്റെ ഐതിഹാസിക തിരിച്ചുവരവിന് വഴിയൊരുക്കിയ ഒ.ജി അനുനോബിയുടെ (OG Anunoby) ഫ്ലൈയിംഗ് ടിപ്പ്-ഇൻ ഷോട്ട് ‘മികച്ച പ്ലേ’ (Best Play) ആയും തിരഞ്ഞെടുക്കപ്പെട്ടു. നിക്സിന്റെ കടുത്ത ആരാധകനായ പ്രശസ്ത റാപ്പർ ഫാറ്റ് ജോ (Fat Joe) തന്റെ “ഓൾ ദി വേ അപ്പ്” (All the Way Up) എന്ന ഹിറ്റ് ഗാനത്തോടെയാണ് അവാർഡ് ചടങ്ങിന് സമാപനം കുറിച്ചത്.

പരിക്കിനെ തോൽപ്പിച്ച ഐതിഹാസിക കിരീടനേട്ടം

സാൻ അന്റോണിയോ സ്പർസിനെതിരെയുള്ള അഞ്ച് മത്സരങ്ങളുടെ പരമ്പരയിൽ നിക്സിന്റെ 53 വർഷത്തെ കിരീട വരൾച്ചയ്ക്ക് വിരാമമിട്ട ബ്രൺസൺ തന്നെയായിരുന്നു എൻ.ബി.എ ഫൈനൽസ് എം.വി.പി (NBA Finals MVP). പരമ്പരയിലെ അഞ്ച് മത്സരങ്ങളിൽ നാലിലും താരം 30-ലധികം പോയിന്റുകൾ സ്കോർ ചെയ്തിരുന്നു. പ്ലേഓഫിന്റെ അവസാന രണ്ട് റൗണ്ടുകളിലും തന്നെ അലട്ടിയ ഇടതുകൈയിലെയും മണിബന്ധത്തിലെയും (Wrist) കടുത്ത വേദന സഹിച്ചാണ് ബ്രൺസൺ ഈ അവിസ്മരണീയ നേട്ടങ്ങളെല്ലാം കൊയ്തത്. ജൂലൈ 7-ന് താൻ ഈ പരിക്കിനായി ശസ്ത്രക്രിയയ്ക്ക് വിധേയനായ വിവരം ഇ.എസ്.പി.എൻ (ESPN) റേഡിയോയിലൂടെ താരം വെളിപ്പെടുത്തിയിരുന്നു. ഈസ്റ്റേൺ കോൺഫറൻസ് ഫൈനൽസിന്റെ രണ്ടാം മത്സരത്തിനിടയിലാണ് എന്റെ മണിബന്ധത്തിന് പെട്ടെന്ന് ഒരു ബലഹീനത അനുഭവപ്പെടാൻ തുടങ്ങിയത്. ആ നിർണ്ണായക ഘട്ടത്തിൽ ടീമിനെ വിട്ട് കളി നിർത്താൻ എനിക്ക് കഴിയില്ലായിരുന്നു. അതുകൊണ്ട് തന്നെ വേദന മറികടന്ന് എങ്ങനെ മുന്നോട്ട് പോകാമെന്ന് മാത്രമാണ് ഞാൻ ചിന്തിച്ചത്, ബ്രൺസൺ പരിക്കിന്റെ ദിനങ്ങൾ ഓർത്തെടുത്തു. അസാധ്യമായ ഈ കളിമികവിനും പോരാട്ടവീര്യത്തിനുമുള്ള അംഗീകാരം കൂടിയായി മാറിയിരിക്കുകയാണ് ഇപ്പോൾ ലഭിച്ച ഈ ESPY പുരസ്കാരങ്ങൾ.